உலகின் நம்பர் ஒன் பணக்கார நாடானது சீனா!

’டாலர் தேசம்’, ’சூப்பர் பவர்’ என்றெல்லாம் பெயர்பெற்ற அமெரிக்காவை முந்திக்கொண்டு, உலகின் முதல் பணக்கார நாடானது சீனா.

மொத்தம் 120 டிரில்லியன் டாலர் பொருளாதார மதிப்பை ஈட்டி, உலகின் நம்பர் 1 பணக்கார நாடானது சீனா. இந்தச் செய்தியை, மெக்கன்ஸி குளோபல் இன்ஸ்டிடியூட் ஆராய்ச்சி நிறுவனம் அதிகாரபூர்வமாக வெளியிட்டுள்ளது.

உலக நாடுகளின் மொத்த வருவாயில், 60 சதவீதத்துக்கும் அதிகமாக ஈட்டும் முதல் 10 நாடுகளின் பட்டியலை இந்நிறுவனம் வெளியிட்டுள்ளது. 2000 முதல் 2020-ம் ஆண்டு வரை இந்த ஆய்வு மேற்கொள்ளப்பட்டது. இதன்படி 2000-ல் 156 டிரில்லியன் டாலராக இருந்த உலகின் பொருளாதார நிகர மதிப்பு, 2020-ல் 514 டிரில்லியன் டாலராக உயர்ந்தது. இதில் 3-ல் ஒரு பங்கை சீனா ஈட்டியுள்ளது.

சீனாவின் நிகர மதிப்பு 2000-ல் வெறும் 7 டிரில்லியன் டாலராக இருந்துள்ளது. பிறகு உலக வர்த்தக மையத்தில் சீனாவும் இணைந்தது. அதன் பிறகு அபரிமிதமான வளர்ச்சி அடைந்து, தற்போது 120 டிரில்லியன் டாலராக நிகர மதிப்பு உயர்ந்துள்ளது. 2-வது இடத்துக்கு தள்ளப்பட்ட அமெரிக்காவின் நிகர மதிப்போ 50 டிரில்லியன் டாலராக தற்போது உள்ளது. அதை அடுத்து ஜெர்மனி, பிரான்சு, பிரிட்டன், கனடா, ஆஸ்திரேலியா, ஜப்பான், மெக்சிகோ, ஸ்வீடன் ஆகிய நாடுகள் இடம்பிடித்துள்ளன.

சீனா மற்றும் அமெரிக்காவில் அந்நாடுகளின் மொத்த வளத்தில் 3-ல் 2 பங்கை 10 சதவீத பணக்காரர்கள் மட்டுமே கையகப்படுத்தியிருப்பதும் இந்த ஆய்வில் தெரியவந்துள்ளது. உலக அளவில் ரியல் எஸ்டேட் வியாபாரத்தில்தான் 68 சதவீத நிகர மதிப்பு குவிந்துள்ளதை இந்த ஆய்வு முடிவு சுட்டிக்காட்டியுள்ளது.