ஊட்டியில் சாலைகளில் பெருக்கெடுத்து ஓடும் கழிவு நீர்!

ஊட்டி: ஊட்டியில் ஒருநாள் மழைக்கே தாக்கு பிடிக்காமல் பாதாள சாக்கடையில் பல இடங்களில் அடைப்பு ஏற்பட்டு இருப்பதால் பொதுமக்கள் அவதிப்படுகின்றனர்.

நீலகிரி மாவட்டம் ஊட்டி நகராட்சியில் 36 வார்டுகள் உள்ளன. இங்கு 1 லட்சத்து 27 ஆயிரத்து 540 பேர் வசித்து வருகின்றனர். மேலும் 500-க்கும் மேற்பட்ட தங்கும் விடுதிகளும், 3 ஆயிரத்துக்கும் மேற்பட்ட வணிக நிறுவனங்களும் உள்ளன.

இதுதவிர ஊட்டிக்கு சுற்றுலாவாக தினமும் வழக்கமான நாட்களில் சுமார் 5 ஆயிரம் பேரும், வார விடுமுறை நாட்களில் சுமார் 10 ஆயிரம் பேரும், சீசன் காலங்களில் தினசரி சுமார் 20 ஆயிரம் பேரும் வந்து செல்கின்றனர். தற்போது மேல்நிலை வகுப்புகளுக்கு பொதுத் தேர்வு முடிந்து பத்தாம் வகுப்புக்கு பொதுத்தேர்வு நடைபெற்று வருவதால் சுற்றுலா பயணிகள் கூட்டம் குறைவாக உள்ளது.

இந்நிலையில் நீலகிரி மாவட்டத்தில் காலையில் மழை பெய்தது. இந்த ஒருநாள் மழைக்கே பிடிக்காமல் தாக்கு பிடிக்காமல் ஊட்டியில் பல்வேறு இடங்களில் பாதாள சாக்கடைகளில் அடைப்பு ஏற்பட்டு சாலைகளில் கழிவுநீர் ஆறாக ஓடுகிறது.

குறிப்பாக ஊட்டி- மேட்டுப்பாளையம் சாலை சேரிங்கிராஸ் பகுதி, ஆட்சியர் அலுவலகத்தில் இருந்து சேரிங்கிராஸ் சாலை, அரசு மருத்துவமனை சாலை, தாவரவியல் பூங்கா பகுதி என பல இடங்களிலும் பாதாள சாக்கடையில் அடைப்பு ஏற்படுகிறது. எல்க்ஹில் சாலையில் இருந்து ஊட்டி பேருந்து நிலையம் செல்லும் சாலையில் பாதாள சாக்கடையில் அடைப்பு ஏற்பட்டு சாலைகளில் கழிவுநீர் செல்கிறது.

இதனால் துர்நாற்றம் ஏற்பட்டு சுகாதார சீர்கேடு உண்டாகும் அபாயம் உள்ளது. இதுகுறித்து சமூக ஆர்வலர்கள் கூறியதாவது: ஊட்டியில் கோடை சீசன் நேரத்திலும், மழை பெய்யும் நேரத்திலும் பாதாள சாக்கடையில் அவ்வப்போது அடைப்பு ஏற்பட்டு கழிவுநீர் சாலையில் வெளியேறி ஆறுபோல் பெருக்கெடுத்து ஓடி வருகிறது.

ஆங்கிலேயர் காலத்தில் அமைக்கப்பட்ட பாதாள சாக்கடை திட்டத்தில் பாதாள சாக்கடை குழாய்கள் சுமார் 6 இன்ச் சுற்றளவில் பதிக்கப்பட்டு உள்ளது. இது அன்றைய சூழ்நிலையில் ஊட்டியில் மக்கள் தொகை எண்ணிக்கைக்கு போதுமானதாக இருந்தது. ஆனால் தற்போது ஊட்டியில் மக்கள் தொகை ஒரு லட்சத்தை தாண்டி உள்ளதால், கழிவுநீர் அதிகளவு சேகரமாகிறது. எனவே, பாதாள சாக்கடை குழாய்களை பெரிய அளவில் பதிக்க நடவடிக்கை எடுக்க வேண்டும். மேலும் ஓட்டல்களில் நாப்கின்களை கழிவறை குழாய்களில் போடக்கூடாது. இவ்வாறு அவர்கள் கூறினார்கள்.