தாம்பரம் - ராமேஸ்வரம் இடையே புதிய ரயில் சேவை: கால அட்டவணை வெளியீடு

சென்னை: தாம்பரம் - ராமேஸ்வரம் இடையே புதிய விரைவு ரயில் சேவை ஏப்.6-ம் தேதி தொடங்குகிறது. இதற்கான, கால அட்டவணையை தெற்கு ரயில்வே வெளியிட்டுள்ளது.

தாம்பரத்தில் இருந்து திருவாரூர், திருத்துறைப்பூண்டி வழியாக ராமேஸ்வரத்துக்கு ஒரு புதிய ரயில் சேவை தொடங்க வேண்டும் என்று ரயில்வே அமைச்சரிடம் பாஜக தமிழக தலைவர் அண்ணாமலை கோரிக்கை மனு அளித்தார். இதை பரிசீலித்த ரயில்வே அமைச்சர் அஸ்வினி வைஷ்ணவ், புதிய ரயில் இயக்க அனுமதி அளித்தார். தொடர்ந்து, ரயில்வே வாரியம் ஒப்புதல் அளித்தது.

இந்நிலையில், இந்த ரயில் சேவை ஏப்.6-ம்தேதி தொடங்குகிறது. மேலும் இதற்கான கால அட்டவணை வெளியிடப்பட்டுள்ளது. அதன் விவரம்: தாம்பரத்தில் இருந்து ஏப்.6-ம் தேதி மாலை 6.10 மணிக்கு விரைவு ரயில் (16103) புறப்பட்டு, மறுநாள் அதிகாலை 5.40 மணிக்கு ராமேஸ்வரத்தை சென்றடையும். ராமேஸ்வரத்தில் இருந்து ஏப்.6-ம் தேதி மாலை 4 மணிக்கு விரைவு ரயில் (16104) புறப்பட்டு, மறுநாள் அதிகாலை 3.45 மணிக்கு தாம்பரத்தை வந்தடையும்.

இந்த ரயில் செங்கல்பட்டு, விழுப்புரம், திருப்பாதிரிபுலியூர், சிதம்பரம், மயிலாடுதுறை, திருவாரூர், திருத்துறைப்பூண்டி, பட்டுக்கோட்டை, அறந்தாங்கி, காரைக்குடி, சிவகங்கை, மானாமதுரை, பரமக்குடி, ராமநாதபுரம் ஆகிய ரயில் நிலையங்களில் நின்று செல்லும். இந்த ரயிலுக்கான டிக்கெட் முன்பதிவு வெள்ளிக்கிழமை (ஏப்.4) காலை 8 மணிக்கு தொடங்குகிறது. இத்தகவல் தெற்கு ரயில்வே வெளியிட்ட செய்திக்குறிப்பில் தெரிவிக்கப்பட்டுள்ளது