ஐ.சி.எஃப் ஆலையில் 3,007 ரயில் பெட்டிகள் தயாரித்து சாதனை

சென்னை: சென்னை ஐ.சி.எஃப் ஆலையில் 2024-25-ம் நிதியாண்டில் 3,007 ரயில் பெட்டிகள் தயாரித்து, புதிய சாதனை படைக்கப்பட்டுள்ளது. உலகப்புகழ் பெற்ற ரயில் பெட்டிகள் தயாரிப்பு தொழிற்சாலைகளில் ஒன்றாக சென்னை ஐ.சி.எஃப் (ஒருங்கிணைந்த ரயில் பெட்டி தொழிற்சாலை) திகழ்கிறது.

இங்கு வந்தே பாரத் பெட்டிகள், எல்.எச்.பி என்னும் நவீன பெட்டிகள், ஏசி மின்சார ரயில், மெமு ரயில் பெட்டிகள் உள்பட பல்வேறு வகைகளில் 70,000-க்கும் மேற்பட்ட ரயில் பெட்டிகள் தயாரிக்கப்பட்டுள்ளன. தற்போது வந்தே பாரத், அம்ரித் பாரத் ரயில்கள், எல்எச்பி ரயில் பெட்டிகள், ஏசி மின்சார ரயில்கள் தயாரிப்பதில் அதிக கவனம் செலுத்தப்படுகிறது. இந்த ஆலையில் கடந்த நிதியாண்டில் (2023-24) 2,829 பெட்டிகள் தயாரிக்கப்பட்டிருந் தன. இந்த ஆண்டு 3,000 பெட்டிகள் தயாரிக்க திட்டமிடப்பட்டிருந்தது.

இந்நிலையில், இந்த ஆலையில் 2024-25-ம் நிதியாண்டில் 3,007 ரயில் பெட்டிகள் தயாரித்து புதிய உற்பத்தி சாதனை படைக்கப்பட் டுள்ளது. இது குறித்து, ஐ.சி.எஃப் அதிகாரிகள் கூறியதாவது: ஐசிஎஃப்-பில் முந்தைய உற்பத்தி சாதனை முறியடிக்கப்பட்டுள்ளது. விநியோகிக்கப்பட்ட பவர்ரோலிங் ஸ்டாக் பெட்டிகளான 1,169 பெட்டிகள் தயாரிக்கப்பட்டுள் ளன. இதில் வந்தே பாரத் தூங்கும் வசதி பெட்டிகள்,வந்தே பாரத் சேர்கார், மின்சார, மெமு ரயில் பெட்டிகள் ஆகியவை அடங்கும். இதுதவிர, 1,838 எல்.எச்.பி பெட்டிகள் தயாரிக்கப்பட்டுள்ளன.

குறிப்பாக, தூங்கும் வசதி கொண்ட வந்தே பாரத் ரயிலை (16 பெட்டிகள்) ஐ.சி.எஃப் அறிமுகப்படுத்தியது. இதுதவிர, 8 கருவூல வேன் பெட்டிகள் தயாரிப்பு, 12 கார்கள் கொண்ட நமோ பாரத் ரேபிட் ரயில் தயாரிப்பு, 21 வந்தே பாரத் ரயில்கள் தயாரிப்பு, அம்ரித் பாரத் 2.0 ரயில்கள் தயாரிப்பு உள்ளிட்டவை கடந்த நிதியாண்டில் ஐ.சி.எஃப்-ன் சிறப்பு நிகழ்வுகள் ஆகும். இவ்வாறு அவர்கள் கூறினர். இச்சாதனை படைக்க உறு துணையாக இருந்த ஐ.சி.எஃப் அதிகாரிகள், ஊழியர்களை ஐ.சி.எஃப் பொதுமேலாளர் யு.சுப்பாராவ் பாராட்டி இனிப்பு வழங்கினார்.