சிவகாசி நகர்நல அலுவலர் இடமாற்றம்: தூய்மை பணி ஒப்பந்த நிறுவனத்துக்கு அபராதம் விதித்தது காரணமா?

விருதுநகர்: சிவகாசி மாநகராட்சியில் தூய்மைப் பணியை மேற்கொள்ளும் தனியார் ஒப்பந்த நிறுவனம் முறையாக பணிகளை செய்யாததால் ரூ.37 லட்சம் அபராதம் விதிக்க பரிந்துரை செய்த நிலையில், நகர்நல அலுவலர் காத்திருப்போர் பட்டியலுக்கு மாற்றப்பட்டது அதிகாரிகளிடையே அதிர்ச்சியை ஏற்படுத்தி உள்ளது.

சிவகாசி மாநகராட்சியில் நகராட்சி நிர்வாக ஆணையர் உத்தரவுப்படி 2022-ம் ஆண்டு ஏப்ரல் முதல் தூய்மைப் பணிகள் அனைத்தும் தனியார் ஒப்பந்த நிறுவனம் வசம் ஒப்படைக்கப்பட்டது. இதற்காக தனியார் நிறுவனத்துக்கு ஆண்டுக்கு ரூ.8.5 கோடி மாநகராட்சி சார்பில் வழங்கப்படுகிறது. தனியார் நிறுவனம் தூய்மைப் பணிக்கு 270 பணியாளர்களை நியமித்து குப்பையை தரம் பிரித்து வழங்க வேண்டும்.

தனியார் ஒப்பந்தம் நிறுவனம் போதிய பணியாளர்களை நியமிக்காமல், உபகரணங்கள் வழங்காததால் தூய்மைப் பணிகள் பாதிக்கப்பட்டு வருவதாக மாநகராட்சி கூட்டத்தில் கவுன்சிலர்கள் புகார் தெரிவித்து வந்தனர். அதன் அடிப்படையில் சுகாதாரப் பிரிவு அதிகாரிகள் தூய்மைப் பணிகளை ஆய்வு செய்த போது, 270 பேருக்கு 170 பணியாளர்களை கொண்டு தூய்மைப் பணிகளை மேற்கொண்டது, பணியாளர்களுக்கு இ.எஸ்.ஐ, பி.எஃப் தொகை செலுத்தாதது, குப்பையை தரம் பிரிக்காதது, மாநகராட்சி வாகனங்களை முறையாக பராமரிக்காதது உள்ளிட்ட பல்வேறு விதிமீறல்கள் இருப்பது தெரியவந்தது.

இதையடுத்து நகர் நல அலுவலர் சரோஜா தனியார் ஒப்பந்த நிறுவனத்துக்கு ரூ.37 லட்சம் அபராதம் விதிக்க பரிந்துரை செய்தார். ஆனால், அந்த பரிந்துரை மீது அதிகாரிகள் நடவடிக்கை எடுக்காமல் இருந்து வந்தனர். இதுகுறித்து நாளிதழ்களில் செய்தி வெளியானதை அடுத்து, கடந்த ஜனவரி மாதம் ஒப்பந்த நிறுவனத்துக்கு ரூ.37 லட்சம் அபராதம் விதிக்கப்பட்டது.

இதனால் நகர் நல அலுவலரை இடமாற்றம் செய்ய வேண்டும் என அரசியல் தரப்பு மற்றும் ஒப்பந்த நிறுவனம் சார்பில் நெருக்கடி அளிக்கப் பட்டதாக கூறப்படுகிறது. இந்நிலையில், நகர் நல அலுவலர் சரோஜாவை தென்காசி நகராட்சிக்கு இடமாற்றம் செய்து, சுகாதாரத்துறை செயலர் உத்தரவிட்டார். ஆனால், தென்காசியில் நகர்நல அலுவலர் பணியிடம் இல்லாததால் காத்திருப்போர் பட்டியலில் உள்ளார். தூய்மைப் பணியில் நடந்துவரும் முறைகேட்டை சுட்டிக்காட்டிய அலுவலர் காத்திருப்பு பட்டியலில் வைக்கப்பட்டுள்ளது அதிகாரிகளிடையே அதிர்ச்சியை ஏற்படுத்தியுள்ளது.

ஏற்கெனவே நகர்நல அலுவலர் சரோஜா திருநெல்வேலி மாநகராட்சியில் பணியாற்றிய போது, ஒரு மாதத்தில் ரூ.55 லட்சத்துக்கு பினாயில் வாங்கிய முறைகேட்டை வெளிக் கொண்டு வந்ததால் அங்கிருந்து சிவகாசிக்கு இடமாற்றம் செய்யப்பட்டார். சிவகாசியிலும் அதே ஒப்பந்த நிறுவனம் தூய்மைப் பணியை மேற்கொண்டு வருவது குறிப்பிடத்தக்கது.