-
-
-
Loading
புதுச்சேரி: புதுச்சேரி அருகே சளி தொல்லையால் உடல்நலம் பாதிக்கப்பட்டு தனியார் மருத்துவமனைக்கு சிகிச்சைக்கு சென்ற கப்பல் பணியாளர் உயிரிழந்தார். மருத்துவரின் அலட்சியமே உயிரிழப்புக்கு காரணம் என கண்டித்து உறவினர்கள் மருத்துவமனையை முற்றுகையிட்டு போராட்டத்தில் ஈடுபட்டனர்.
புதுச்சேரி கிருமாம்பாக்கம் அடுத்த பனித்திட்டு மீனவ கிராமத்தை சேர்ந்தவர் மதினேஷ்வர் (27). கப்பல் பணியாளர். சளி தொல்லையால் பாதிக்கப்பட்டிருந்த இவரை நேற்று உறவினர்கள் அதே பகுதியில் உள்ள தனியார் மருத்துவக் கல்லூரி மருத்துவனையில் சேர்த்தனர். அங்கு அவருக்கு தீவிர சிகிச்சை அளித்தும் சிகிச்சை பலனின்றி உயிரிழந்தார்.
தகவலறிந்த உறவினர்கள் மற்றும் கிராம மக்கள் மருத்துவர்கள் அவருக்கு உரிய சிகிச்சை அளிக்கவில்லை என்றும், மருத்துவர்களின் அலட்சியத்தால் மதினேஷ்வர் இறந்ததாக கூறி மருத்துவமனையை முற்றுகையிட்டனர். பின்னர் மருத்துமவனை எதிரே கடலூர்- புதுச்சேரி சாலையில் மறியலில் ஈடுபட்டனர். இதனால் போக்குவரத்து பாதிக்கப்பட்டது.
தகவல் அறிந்து வந்த கிருமாம்பாக்கம் போலீஸார், உள்ளூர் அரசியல் பிரமுகர்கள் சமரசம் செய்ததால், மறியலை கைவிட்டு மருத்துவமனை நிர்வாகத்துடன் பேச்சுவார்த்தைக்கு சென்றனர். ஆனால் பேச்சுவர்த்தையில் உடன்பாடு ஏற்படாத நிலையில் மீண்டும் இரவு கடலூர்-புதுச்சேரி சாலையில் மறியல் போராட்டம் செய்தனர். மறியல் போராட்டம் இரவு 10 மணியை தாண்டியும் தொடர்ந்தது. போலீஸாரின் பேச்சுவார்த்தையை தொடர்ந்து அவர்கள் மறியலை கைவிட்டனர். இந்த சாலை மறியலால் கடலூர்-புதுச்சேரி சாலையில் போக்குவரத்து கடுமையாக பாதிக்கப்பட்டது. இதையடுத்து வாகனங்கள் மாற்றுப் பாதையில் திருப்பி விடப்பட்டன.
இந்நிலையில் மதினேஷ்வர் உறவினர்கள் அவரது இறப்புக்கு நியாயம்கேட்டு மீண்டும் இன்று மருத்துவமனை முன்பு கூடினர். மருத்துவமனையின் நுழைவு வாயில்களை இழுத்துமூடி போராட்டம் நடத்தினர். இதன் காரணமாக மருத்துவமனை நோயாளிகள், அவர்களின் உறவினர்கள், பணியாளர்கள் கடுமையாக பாதிக்கப்பட்டனர். அனைவரும் கடலூர்-புதுச்சேரி சாலையோரங்களின் நின்றிருந்தனர். இதையடுத்து அங்கு வந்த எம்எல்ஏ லட்சுமிகாந்தன் போராட்டத்தில் ஈடுபட்டவர்களுடன் பேச்சுவார்த்தை நடத்தினார். அதனையேற்ற அவர்கள் போராட்டத்தை கைவிட்டு கலைந்து சென்றனர். இதனால் அப்பகுதியில் சிறிது பதற்றமான சூழல் நிலவியது.
