சென்னை சென்ட்ரல் - கூடூர் மார்க்கம் மின்சார ரயில் சேவையில் நாளை மாற்றம்!

சென்னை சென்ட்ரல் - கூடூர் மார்க்கத்தில், பொன்னேரி - கவரைப்பேட்டை ரயில் நிலையங்களுக்கு இடையே பொறியியல் பணி நடக்கவுள்ளதால், மின்சார ரயில் சேவையில் நாளை (பிப்.24) மாற்றம் செய்யப்பட உள்ளது.

அதன் விவரம் வருமாறு: சென்னை சென்ட்ரல் - சூலூர்பேட்டைக்கு பிப்.24-ம் தேதி காலை 8.35, 10.15 ஆகிய நேரங்களில் இயக்கப்படும் மின்சார ரயில்கள் ரத்து செய்யப்பட உள்ளன. சென்ட்ரல் - கும்மிடிப்பூண்டிக்கு 24-ம் தேதி காலை 8.05, 9.00, 9.30, 10.30, முற்பகல் 11.35 ஆகிய நேரங்களில் இயக்கப்படும் மின்சார ரயில்கள் ரத்து செய்யப்பட உள்ளன. கடற்கரை - கும்மிடிப்பூண்டிக்கு 24-ம் தேதி காலை 9.40 மணி, நண்பகல் 12.40 ஆகிய நேரங்களில் இயக்கப்படும் மின்சார ரயில்கள் ரத்து செய்யப்பட உள்ளன.

மேலும், கும்மிடிப்பூண்டி - கடற்கரைக்கு 24-ம் தேதி காலை 10.55 மணிக்கு இயக்கப்படும் மின்சார ரயில் ரத்து செய்யப் படுகிறது. கும்மிடிப்பூண்டி - சென்ட்ரலுக்கு 24-ம் தேதி காலை 9.55, 11.25, 12.00, மதியம் 1.00, பிற்பகல் 2.30, 3.15 ஆகிய நேரங்களில் இயக்கப்படும் மின்சார ரயில்கள் ரத்து செய்யப்பட உள்ளன. அதேபோல், சூலூர்பேட்டை - சென்ட்ரலுக்கு 24-ம் தேதி தேதி பகல் 11.45, மதியம் 1.15 ஆகிய நேரங்களில் இயக்கப்படும் மின்சார ரயில்கள் ரத்து செய்யப்படுகின்றன.

பகுதி ரத்து: செங்கல்பட்டு - கும்மிடிப்பூண்டிக்கு 24-ம் தேதி காலை 9.55 மணிக்கு புறப்படும் மின்சார ரயில், கடற்கரை - கும்மிடிப்பூண்டி இடையே பகுதி ரத்து செய்யப்பட உள்ளது. கும்மிடிப்பூண்டி - தாம்பரத்துக்கு 24-ம் தேதி பிற்பகல் 3 மணிக்கு புறப்பட வேண்டிய மின்சார ரயில், கும்மிடிப்பூண்டி - கடற்கரை இடையே பகுதி ரத்து செய்யப்பட உள்ளது.

ரத்து செய்யப்படும் மின்சார ரயில்களுக்குப் பதிலாக, அதேநாளில், சென்ட்ரலில் இருந்து பொன்னேரி, எண்ணூர், மீஞ்சூர் இடையே பாசஞ்சர் சிறப்பு ரயில்கள் இயக்கப்படும். இதுதவிர, சென்னை கடற்கரை - பொன்னேரிக்கு ஒரு பாசஞ்சர் சிறப்பு ரயில் இயக்கப்படும்.

மெமு ரயில்கள் ரத்து: பெதபரியா - நாயுடுபேட்டை இடையே பொறியியல் பணி காரணமாக, 5 ரயில்கள் ரத்து செய்யப்பட உள்ளன. சென்னை சென்ட்ரல் - சூலூர்பேட்டைக்கு பிப்.24, 27, மார்ச் 1 ஆகிய தேதிகளில் அதிகாலை 5.40 மணிக்கு புறப்படும் மெமு ரயில், ஆவடி - சென்ட்ரலுக்கு 24, 27, மார்ச் 1 ஆகிய தேதிகளில் அதிகாலை 4.25 மணிக்கு இயக்கப்படும் மெமு ரயில் ஆகிய ரயில்கள் ரத்து செய்யப்பட உள்ளன. இதுதவிர, 3 மெமு ரயில்கள் ரத்து செய்யப்பட உள்ளன. சென்னை ரயில்வே கோட்டம் வெளியிட்ட செய்திக்குறிப்பில் இத்தகவல் தெரிவிக்கப்பட்டுள்ளது.