போரூரில் ரூ.28 லட்சம் மதிப்புள்ள பழைய 500, 1000 ரூபாய் நோட்டுகளை மாற்ற முயன்ற இருவர் கைது

பூந்தமல்லி: சென்னை- போரூரில் ரூ.28 லட்சம் மதிப்புள்ள பழைய ஐநூறு, ஆயிரம் ரூபாய் நோட்டுகளை மாற்ற முயன்ற இருவரை போலீஸார் கைது செய்தனர்.

சென்னை- போரூர், குன்றத்தூர் சாலை எம்.எஸ்.நகர் அருகே நேற்று இரவு எஸ்ஆர்எம்சி(போரூர்) போலீஸார் வாகன சோதனையில் ஈடுபட்டுக் கொண்டிருந்தனர். அப்போது, அவ்வழியே சந்தேகத்துக்கிடமான வகையில் மோட்டார் சைக்கிளில் வந்த இருவரை போலீஸார் மடக்கி பிடித்து விசாரித்தனர். அப்போது, அவர்கள் முன்னுக்குப் பின் முரணாக பேசியதால், அவர்களின் கை பையை போலீஸார் சோதனை செய்தனர். அச்சோதனையில், ரூ.28 லட்சம் மதிப்புள்ள பழைய ஐநூறு, ஆயிரம் ரூபாய் நோட்டுகள் இருந்ததும், அதனை அவர்கள் மாற்ற முயன்றதும் தெரியவந்தது.

இதையடுத்து, இருவரை போலீஸார் கைது செய்து முதல் கட்ட விசாரணை நடத்தினர். அவ்விசாரணையில் தெரிய வந்ததாவது: ''கைதானவர்கள், செங்கல்பட்டு மாவட்டம், அனகாபுத்தூர் பகுதியை சேர்ந்த ரஞ்சித் குமார் (34), அங்குராஜ்(37). இவர்கள் இருவரும் ரியல் எஸ்டேட், கவரிங் நகை விற்பனை, பிளாஸ்டிக் பொருட்கள் விற்பனை, பழைய பொருட்களை வாங்கி விற்பது போன்ற பணிகளை செய்து வந்துள்ளனர்.

இவர்களுக்கு அறிமுகமான இஸ்மாயில் என்ற நபர், ''என் உறவினரான சீர்காழியைச் சேர்ந்த சதாமிடம் பழைய ஐநூறு, ஆயிரம் ரூபாய் நோட்டுகள் இருக்கிறது. பண மதிப்பிழப்பின் போது அவர் வெளிநாட்டில் இருந்ததால் அவரிடம் இருந்த பணத்தை மாற்ற இயலாமல் போனது. ஆகவே மாற்றி தரவேண்டும். அப்படி மாற்றி தந்தால், கமிஷன் தொகை அளிக்கிறேன்'' என, தெரிவித்துள்ளார்.

இதையடுத்து, கடந்த 20 நாட்களுக்கு முன்பு கோயம்பேட்டைச் சேர்ந்த விக்கியிடம், சதாம் அளித்த ரூ.28 லட்சம் மதிப்புள்ள பழைய ஐநூறு, ஆயிரம் ரூபாய் நோட்டுகளை பெற்ற ரஞ்சித்குமாரும், அங்குராஜும் அதனை மாற்றுவதற்கான நடவடிக்கைகளில் ஈடுபட்டு வந்துள்ளனர். இவ்வாறு அந்த விசாரணையில் தெரிய வந்ததாக போலீஸார் தரப்பில் தெரிவிக்கப்பட்டுள்ளது.