சமூக நீதியின் மீது மரண அடி: முதுநிலை மருத்துவ மாணவர் சேர்க்கை உச்ச நீதிமன்ற தீர்ப்புக்கு கி.வீரமணி கண்டனம்

சென்னை: மருத்துவ மேற்படிப்புகளில் மாநில அரசுகள் தங்களுக்கு என இடங்களை வைத்துக் கொள்ளக் கூடாது என்ற உச்சநீதிமன்ற தீர்ப்பு, சமூக நீதியின் அடிப்படையிலான இட ஒதுக்கீட்டிற்கும், மாநில உரிமைக்கும் மரண அடியாக அமையும் என திராவிடர் கழகத் தலைவர் கி.வீரமணியின் கண்டித்துள்ளார்.

இது தொடர்பாக அவர் வெளியிட்டுள்ள அறிக்கையில், "எம்பிபிஎஸ் தவிர முதுநிலை மற்றும் மருத்துவ மேற்படிப்புகளில் மாநில அரசுகள் தங்களுக்கு என இடங்களை வைத்துக் கொள்ளக் கூடாது என்று உச்சநீதிமன்ற மூன்று நீதிபதிகள் கொண்ட அமர்வு அளித்த தீர்ப்பு, அரசமைப்புச் சட்டம் அங்கீகரித்த சமூக நீதியின் அடிப்படையிலான இட ஒதுக்கீட்டிற்கும், மாநில உரிமைக்கும் மரண அடியாக அமையும் ஆபத்தை ஏற்படுத்தியுள்ளது.

குடியிருப்பின் அடிப்படையில் இட ஒதுக்கீடு கூடாதாம்! இந்தத் தீர்ப்பு தமிழ்நாட்டைப் பொறுத்தவரையில் மிகப்பெரிய பாதிப்பாகும். தனது சொந்த செலவில், மாநிலத்தில் உள்ள மாணவர்கள் மருத்துவர்களாக வர வேண்டும் என்ற நோக்கத்தோடு மாநில அரசு செயல்பட்டால், அதில் அத்து மீறி நுழைந்து, அனைத்து மாநிலங்களுக்கும் ‘தானம்’ செய்யும் அதிகாரம் என்பது அரசமைப்புச் சட்டப்படி சரியானதா?.

ஏற்கெனவே மருத்துவ மேற்படிப்பில் 50 விழுக்காட்டைக் கபளீகரம் செய்யும் மத்திய அரசு, மாநில அளவிலான 50 விழுக்காட்டையும் பறிப்பது பகற்கொள்ளையாகும். இதனைத் தமிழ்நாடு அனுமதிக்காது. தமிழ்நாடு அரசும் பணியாது; இதன் மீது சட்ட ரீதியான மேல் நடவடிக்கையை நீதிமன்றத்தின் மூலமும், மக்கள் மன்றத்தின் மூலமும் மேற்கொள்ள வேண்டும் என்று வலியுறுத்துகிறோம்” என்று வீரமணி தெரிவித்துள்ளார்.