டெல்லியில் குடியரசு தினவிழா: தமிழக அரசு பள்ளி மாணவி சிறப்பு விருந்தினராக அழைப்பு!

ராமேசுவரம்: ராமேசுவரம் அருகே ரெகுநாதபுரம், அரசு மாதிரி மேல்நிலைப் பள்ளி, பத்தாம் வகுப்பு மாணவி பிருந்தா, வீர் கதா போட்டியில் தேசிய அளவில் தேர்வு செய்யப்பட்டு டெல்லியில் நடைபெறும் குடியரசு தின விழாவில் சிறப்பு விருந்தினராக கலந்து கொள்ள இருக்கிறார்.

இந்திய பாதுகாப்புத் துறை மற்றும் கல்வித் துறை இணைந்து ஒவ்வொரு ஆண்டும் வீர் கதா போட்டியை நடத்தி வருகின்றன. இதில் முதல் இந்திய சுதந்திரப் போரில் பழங்குடியினரின் எழுச்சி, ராணி லட்சுமிபாய் உள்ளிட்ட விடுதலைப் போராட்ட வீரர்கள், விடுதலைக்குப் பின் வீரதீர செயல்களுக்கான விருது பெற்றவர்கள் ஆகியோரின் வாழ்க்கை வரலாற்றை மாணவர்கள் அறியச் செய்து அதன் மூலம் நாட்டுப் பற்றையும், குடிமை உணர்வையும் அவர்களிடம் வளர்க்கும் நோக்கில், ஓவியம், கவிதை, கட்டுரை, பல்லூடக விளக்கக் காட்சி போன்ற போட்டிகள் நடைபெறும்.

இந்தாண்டு நடந்த போட்டியில் அனைத்து மாநிலம் மற்றும் யூனியன் பிரதேசங்களில் உள்ள 2.31 லட்சம் பள்ளிகளில் இருந்து சுமார் 1.76 கோடி மாணவர்கள் பங்கேற்றனர். இதில் 3-5, 6-8, 9-10, 11-12 ஆகிய வகுப்புகளில் ஒவ்வொரு பிரிவிலும் 25 மாணவர்கள் என தேசிய அளவில் மொத்தம் 100 பேர் தேர்வு செய்யப்பட்டுள்ளனர்.

இதில் ராமநாதபுரம் மாவட்டம் ரெகுநாதபுரம், அரசு மாதிரி மேல்நிலைப் பள்ளியில், பத்தாம் வகுப்பு பயிலும் அய்யாத்துரை என்பவர் மகள் பிருந்தா, 9-10 வகுப்பு பிரிவில் தேசிய அளவில் 25 பேரில் ஒருவராக தேர்வு செய்யப்பட்டுள்ளார். இவர் ஆங்கில பட்டதாரி ஆசிரியரும் பள்ளியின் நூலகப் பொறுப்பாளருமான வளர்மதியின் வழிகாட்டுதலில் 'ராணி லட்சுமி பாய் என் கனவில் வந்தார். நம் நாட்டுக்கு நான் சேவை செய்ய வேண்டும் என்று அவர் விரும்பினார்” என்ற தலைப்பில் கட்டுரை எழுதியிருந்தார்.

மாணவி பிருந்தா, ரொக்கப் பரிசு, சான்றிதழ், டெல்லியில் நடைபெறும் குடியரசு தின விழா அணிவகுப்பை சிறப்பு விருந்தினராக நேரில் காணும் வாய்ப்பும் பெற்றுள்ளார். தமிழ்நாடு அளவில் தேர்வு செய்யப்பட்ட அரசு பள்ளி மாணவி பிருந்தா மட்டும்தான் என்பது குறிப்பிடத்தக்கது. மாணவி பிருந்தா, வழிகாட்டிய ஆங்கிலப் பட்டதாரி ஆசிரியர் வளர்மதி ஆகியோரை ராமநாதபுரம் மாவட்ட முதன்மைக் கல்வி அலுவலர் சின்னராசு, பள்ளித் தலைமை ஆசிரியர் யுனைசி மற்றும் ஆசிரியர்கள் பாராட்டினர்.

தேசிய அளவில் வீர் கதா போட்டியில் வென்ற ரெகுநாதபுரம், அரசு மாதிரி மேல்நிலைப்பள்ளி, மாணவி பிருந்தாவை பாராட்டி மாவட்ட முதன்மைக் கல்வி அலுவலர் சின்னராசு. உடன் பள்ளித் தலைமை ஆசிரியர் யுனைசி, வழிகாட்டி ஆசிரியர் வளர்மதி, மாணவியின் தந்தை அய்யாத்துரை