-
-
-
Loading
சென்னை: கல்லூரி மாணவர்களுக்கு போதை பொருள் விற்பனை செய்தாக பதியப்பட்ட வழக்கில் கைதான நடிகர் மன்சூர் அலிகானின் மகன் அலிகான் துக்ளக்குக்கு நிபந்தனை ஜாமீன் வழங்கி உயர் நீதிமன்றம் உத்தரவிட்டுள்ளது. முகப்பேர் மேற்கு பகுதியில் தனியார் கல்லூரி மாணவர்களுக்கு செல்போன் செயலி மூலமாக போதைப் பொருட்களை விற்பனை செய்ததாக 5 கல்லூரி மாணவர்களை ஜெ.ஜெ.நகர் போலீஸார் கைது செய்தனர்.
போலீஸாரின் விசாரணையில் போதைப் பொருள் கடத்தலில் நடிகர் மன்சூர் அலிகானின் மகன் அலிகான் துக்ளக்குக்கு தொடர்பு இருப்பது தெரியவந்ததால் அவரை போலீஸார் கடந்த டிச.4-ம் தேதி கைது செய்தனர்.
இந்த வழக்கில் தனக்கு ஜாமீன் வழங்கக் கோரி அலிகான் துக்ளக் சென்னை உயர்நீதி மன்றத்தில் மனுத் தாக்கல் செய்திருந்தார். கையெழுத்திட வேண்டும் இந்த மனு மீதான விசாரணை நீதிபதி ஏ.டி.ஜெகதீஷ் சந்திரா முன்பாக நடந்தது. அப்போது, அலிகான் துக்ளக்கிடமிருந்து எந்த போதைப் பொருளும் பறிமுதல் செய்யப்படவில்லை.
கைதான மற்ற நபர்கள் அளித்த வாக்குமூலத்தின் அடிப்படையிலேயே அவர் கைது செய்யப்பட்டதாக காவல் துறை தரப்பில் தெரிவிக்கப்பட்டது. அதையடுத்து நீதிபதி ஏ.டி.ஜெகதீஷ் சந்திரா, குற்றம்சாட்டப்பட்ட அலிகான் துக்ளக் மறு உத்தரவு பிறப்பிக்கும்வரை ஜெ.ஜெ.நகர் காவல் நிலையத்தில் தினமும் காலையில் ஆஜராகி கையெழுத்திட வேண்டும், என்ற நிபந்தனையுடன் ஜாமீன் வழங்கி உத்தரவிட்டார்.
