‘நீங்கள் பாடம் எடுக்கும் இடத்தில் நாங்கள் இல்லை’ - ஆளுநரை கண்டித்து திமுக நடத்திய ஆர்ப்பாட்டத்தில் கனிமொழி விமர்சனம்

சென்னை: ஆளுநரை​யும், அதிமுக - பாஜகவை​யும் எதிர்த்து சென்னை​யில் நடைபெற்ற ஆர்ப்​பாட்​டத்​தில், ‘நீங்கள் பாடம் எடுக்​கும் இடத்​தில் நாங்கள் இல்லை. ஆளுநரை விரட்டும் நாள் வெகுதூரத்​தில் இல்லை’ என்று மொழி எம்.பி. தெரி​வித்​தார். தமிழக சட்டப்​பேர​வை​யில் உரையை வாசிக்​காமல் ஆளுநர் வெளி​யேறிய​தால் சர்ச்சை ஏற்பட்​டது.

இதையடுத்து, தமிழகத்​தை​யும் தமிழ்த்​தாய் வாழ்த்​தை​யும் தொடர்ந்து அவமானப்​படுத்​தும் ஆளுநரைக் கண்டித்​தும், ஆளுநரைக் காப்​பாற்றும் அதிமுக - பாஜககள்ளக் கூட்​ட​ணி​யைக் கண்டித்​தும், திமுக சார்​பில் மாவட்ட தலைநகரங்​களில் ஆர்ப்​பாட்டம் நடத்​தப்​படும் என்று அறிவிக்​கப்​பட்​டது. அதன்படி தமிழகம் முழு​வதும் மாவட்ட தலைநகரங்​களில் திமுக சார்​பில் ஆர்ப்​பாட்டம் நடைபெற்றது.

சென்னை, சைதாப்​பேட்டை பனகல் மாளிகை அருகில் நடைபெற்ற ஆர்பாட்​டத்​தில், எம்.பி.க்கள் கனிமொழி, தயாநி​தி​ மாறன், கிரிராஜன், அந்தி​யூர் செல்​வ​ராஜ், கனிமொழி என்.வி.என்.சோமு மற்றும் அமைப்பு செயலாளர் ஆர்.எஸ்​.பாரதி, எம்எல்​ஏக்கள் தாயகம் கவி, வேலு, பரந்​தாமன் உள்ளிட்ட ஏராள​மானோர் பங்கேற்​றனர்.

ஆர்ப்​பாட்​டத்​தில் கனிமொழி எம்பிபேசி​ய​தாவது: குழந்தைகள் விடு​முறை எடுப்​ப​தற்கு காரணம் கூறு​வதைப்​போல் ஆளுநர் கூறுகிறார். விடு​முறை விண்​ணப்பம் எழுதி அனுப்​பினால், முதல்வர் விட்டு​விடு​வார். எதிரிகளை புறமுதுகிட்டு ஓடச்​செய்​யும் இயக்கம் திமுக. முதல்வர் எழுந்து நின்​றாலே ஆளுநர் ஓடிவிடு​கிறார்.

தமிழக சட்டப்​பேர​வை​யில் தமிழ்த்​தாய் வாழ்த்​து​தான் முதலில் பாடப்​படும். அதுதான் மரபு. நாங்கள் தேசிய கீதத்தை அவமதிக்க​வில்லை. உங்களுக்​கும் நாட்டு விடு​தலைக்​கும் என்ன சம்பந்​தம்? தமிழகத்​தில் இருந்து நாட்​டின் விடு​தலைக்காக எத்தனையோ பேர் போராடி சுதந்​திரத்​தைப் பெற்றுத் தந்துள்ளனர்.

ஆனால், நீங்கள் மன்னிப்​புக் கடிதம் எழுதிக்​கொடுத்து வெளி​யில் வந்தவர்​கள். உங்களுக்​கும் சுதந்​திரத்​துக்​கும், தேசிய கீதத்​துக்​கும் என்ன சம்பந்தம் உள்ளது. நீங்கள் பாடம் எடுக்​கும் இடத்​தில் நாங்கள் இல்லை. நாங்கள் பி.எச்டி. பாஸ் செய்​து​விட்​டோம். நீங்கள் பள்ளி அளவில்​தான் உள்ளீர்​கள். ஆளுநரை ஓடஓட விரட்டும் நாள் வெகு தொலை​வில் இல்லை. பொறுத்தது போதும் என்ற ஒருநாள் வரும்​போது உங்கள் நாவை அடக்கி விடு​வீர்​கள்.

ஆர்எஸ்எஸ் இந்துத்துவா கூட்​டத்தை எதிர்த்து முதல்வர் தொடர்ந்து போராடி வருகிறார். ஆளுநரை தொடர்ந்து எதிர்ப்​போம். மக்களின் அரணாக ​முதல்​வர் இருக்​கும்​போது, ரப்​பர் ஸ்​டாம்ப் ஆளுநருக்கு எதற்கு அரசி​யல். பாஜகவை தொடர்ந்து அச்​சுறுத்​தும் இயக்​கம் ​தி​முக. இவ்​வாறு அவர்​ பேசினார்.

1500 பேர் கைது: தடையை மீறி போராட்டத்தில் ஈடுபட்டதாக எம்பிக்கள் கனிமொழி, தயாநிதி மாறன், திமுக அமைப்புச் செயலாளர் ஆர்.எஸ்.பாரதி உட்பட திமுகவை சேர்ந்த சுமார் 1,500 பேர் மீது சைதாப்பேட்டை காவல் நிலைய போலீஸார் வழக்குப்பதிவு செய்துள்ளனர். தடையை மீறி போராட்டம் நடத்துதல், அரசு ஊழியரின் உத்தரவை மீறுதல் ஆகிய இரு பிரிவுகளின் கீழ் வழக்கு பதிவு செய்யப்பட்டுள்ளதாக போலீஸ் தரப்பில் தெரிவிக்கப்பட்டது.