-
-
-
Loading
முட்டுக்காடு: சென்னையை அடுத்துள்ள முட்டுக்காட்டில் தமிழ்நாடு சுற்றுலா வளர்ச்சிக் கழகத்துக்கு சொந்தமான படகு குழாம் உள்ளது.
இந்த படகு குழாமில் தனியார் பங்களிப்புடன் தமிழ்நாடு சுற்றுலா வளர்ச்சிக் கழகம் சார்பில் 5 கோடி ரூபாய் மதிப்பீட்டில் 125 அடி நீளம், 25 அடி அகலத்தில் பிரம்மாண்டமான உணவகத்துடன் கூடிய இரண்டு அடுக்கு மிதக்கும் கப்பல் உருவாக்கப்பட்டுள்ளது. இதற்கான கட்டுமானப்பணி கடந்த ஆண்டு மார்ச் 27-ம் தேதி தொடங்கியது.
இந்நிலையில் கப்பல் கட்டுமானப் பணிகள் முடிவடைந்து விட்டதால் அதன் திறப்பு விழா இன்று மாலை (ஜன.7) நடைபெற்றது. சுற்றுலா வளர்ச்சிக் கழக மேலாண்மை இயக்குநர் ஷில்பா பிரபாகர் சதீஷ் தலைமை தாங்கினார். தமிழ்நாடு சுற்றுலா வளர்ச்சிக் கழகத் தலைவர் சந்தரமோகன் வரவேற்றார். எம்.எல்.ஏக்கள் தாம்பரம் - எஸ்.ஆர்.ராஜா, பல்லாவரம் - இ.கருணாநிதி, செங்கல்பட்டு - வரலட்சுமி, திருப்போரூர் - எஸ்.எஸ்.பாலாஜி ஆகியோர் முன்னிலை வகித்தனர். தமிழ்நாடு சிறு, குறு, நடுத்தர நிறுவனங்கள் துறை அமைச்சர் தா.மோ.அன்பரசன் படகு உணவகத்தை திறந்து வைத்தார். தமிழ்நாடு சுற்றுலாத்துறை அமைச்சர் இரா.இராஜேந்திரன் படகு பயணத்தை கொடியசைத்து தொடங்கி வைத்து பலூன்களை பறக்க விட்டார்.
இதைத் தொடர்ந்து அவர் செய்தியாளர்களிடம் கூறியதாவது: தனியார் பங்களிப்புடன் தமிழ்நாட்டிலேயே முதன் முறையாக 5 கோடியே 23 லட்சம் ரூபாய் மதிப்பில் இந்த மிதக்கும் படகு உணவகம் தொடங்கப்பட்டுள்ளது. இன்று முதல் இதை சுற்றுலாப் பயணிகள் பயன்படுத்தலாம். தனி நபர் கட்டணம், குழு கட்டணம், தனியார் நிறுவன ஊழியர்களுக்கான கட்டணம் போன்றவை இன்று அறிவிக்கப்படும். இங்கு கிடைக்கும் வரவேற்பை பொறுத்து வாய்ப்புள்ள மற்ற இடங்களிலும் இதுபோன்ற படகு உணவகம் தொடங்கப்படும். தமிழ்நாடு முழுவதும் 300 சுற்றுலா மையங்களை உருவாக்க முதலமைச்சர் உத்தரவிட்டுள்ளார் என்றார்,
‘சீன்ஸ் க்ரூஸ்’ என பெயரிடப்பட்டுள்ள இந்த கப்பலில் அமைந்துள்ள ஒட்டுமொத்த உணவகமும் குளிர்சாதன வசதி கொண்டது. இம்மிதவை படகு உணவகம் 3000 சதுர அடி பரப்பளவுடன் இரண்டு அடுக்குகள் கொண்ட 100 நபர்கள் அமர்ந்து உணவருந்தும் வசதிகளுடன் வடிவமைக்கப்பட்டுள்ளது. மேலும், கருத்தரங்குகள், அலுவலக கூட்டங்கள், பிறந்தநாள் கொண்டாட்டங்கள், கேளிக்கை விருந்துகள் போன்ற நிகழ்ச்சிகள் நடத்திட ஏதுவாக இப்படகு உணவகம் வடிவமைக்கப்பட்டுள்ளது.
