-
-
-
Loading
மதுரை: தமிழகத்தின் முதல் ஜல்லிக்கட்டுப் போட்டியான அவனியாபுரம் ஜல்லிக்கட்டுக்கான ஏற்பாடுகளை அமைச்சர் பி.மூர்த்தி முகூர்த்தக்கால் நட்டு நேற்று தொடங்கிவைத்தார்.
மதுரை மாவட்டத்தில் அவனியாபுரம், பாலமேடு மற்றும் அலங்காநல்லூரில் தமிழக அரசு சார்பில் ஆண்டுதோறும் ஜல்லிக்கட்டுப் போட்டிகள் நடைபெற்று வருகின்றன.
இந்தப் போட்டிகளில் தமிழகம் முழுவதும் இருந்து சிறந்த காளைகள் பங்கேற்கின்றன. மேலும், போட்டிகளைக் காண உள்நாடு மட்டுமின்றி, வெளிநாடுகளில் இருந்தும் ஏராளமான சுற்றுலாப் பயணிகள் ஆர்வத்துடன் கலந்து கொள்வதால், இது உலகப் புகழ்பெற்றதாக விளங்குகிறது. ஜன. 14-ல் ஜல்லிக்கட்டு
பொங்கல் பண்டிகை நாளில், தமிழகத்தின் முதல் ஜல்லிக்கட்டுப் போட்டியாக அவனியாபுரம் ஜல்லிக்கட்டு நடைபெறும். இந்த ஆண்டு இந்தப் போட்டி ஜன.14-ம் தேதி நடைபெறுகிறது.
இந்தப் போட்டிக்கான வாடிவாசல், பார்வையாளர் மாடம், மாடுகள் சேகரிக்கும் இடம் அமைப்பதற்கான முகூர்த்தக் கால் நடும் விழா நேற்று நடைபெற்றது. மேயர் இந்திராணி தலைமை வகித்தார். ஆட்சியர் சங்கீதா, மாநகராட்சி ஆணையர் தினேஷ் குமார் ஆகியோர் முன்னிலை வகித்தனர். அமைச்சர் பி.மூர்த்தி முகூர்த்தக்கால் நட்டு, ஜல்லிக்கட்டு விழா பணிகளை தொடங்கி வைத்தார்.
நிகழ்ச்சியில், மாநகர காவல் ஆணையர் லோகநாதன், உதவி ஆட்சியர் (பயிற்சி) வைஷ்ணவி பால், சட்டப்பேரவை உறுப்பினர் மு.பூமிநாதன், துணை மேயர் நாகராஜன் மற்றும் பலர் கலந்து கொண்டனர்.
