-
-
-
Loading
சென்னை: நூறு வயதை கடந்தும் தமிழ்ச் சமுதாயத்துக்காக நல்லகண்ணு இன்னும் உழைக்க தயாராக இருப்பதாகவும் நமக்கு வழிகாட்டியாக திகழ்கிறார் என்றும் முதல்வர் மு.க.ஸ்டாலின் பெருமிதம் தெரிவித்துள்ளார்.
விடுதலை போராட்ட வீரரும் இந்திய கம்யூனிஸ்ட் இயக்கத்தின் முதுபெரும் தலைவருமான நல்லகண்ணு நூற்றாண்டு விழா தர்மலிங்கம் அறவழித் தொண்டு கல்வி அறக்கட்டளை சார்பில் மாமனிதருக்கு மக்கள் விழா என்ற பெயரில் சென்னையில் நேற்று நடைபெற்றது. அறக்கட்டளையின் நிறுவனர் த.மணிவண்ணன் வரவேற்புரை ஆற்றினார். உலகத் தமிழர் பேரமைப்பு தலைவர் பழ.நெடுமாறன் தலைமை உரையாற்றினார்.
அப்போது அவர் பேசும்போது, ‘நாட்டின் விடுதலைக்காக போராடிய காந்தி, நேரு, வல்லபாய் பட்டேல், தமிழகத்தின் பெரும் தலைவர்களாக திகழ்ந்த பெரியார், அண்ணா, காமராஜர், கருணாநிதி ஆகியோரின் நூற்றாண்டு விழாவை அவர்கள் வாழும் நாளிலேயே கொண்டாட முடியவில்லை. ஆனால், முதன்முதலாக நல்லகண்ணுவின் நூற்றாண்டு விழாவை அவர் வாழும் காலத்திலேயே கொண்டாடும் வாய்ப்பு கிடைத்துள்ளது. நல்லகண்ணு தியாகம், தொண்டு, எளிமை, இனிமை ஆகியவற்றால் நிறைகுடம் போன்றவர். அவருடைய தியாகத்துக்கு ஈடு இணை கிடையாது” என்றார்.
சிறப்பு விருந்தினராக பங்கேற்ற தமிழக முதல்வர் மு.க.ஸ்டாலின், நல்லகண்ணு பிறந்த நாளை முன்னிட்டு இயற்றிய பாடலையும், நல்லகண்ணு குறித்து 100 கவிஞர்கள் எழுதிய கவிதை நூலையும் வெளியிட்டார். பின்னர் அவர் பேசியதாவது: நல்லகண்ணுவை வாழ்த்துவதற்காக நாங்கள் வரவில்லை. அவரிடம் இருந்து வாழ்த்து பெற வந்திருக்கிறோம். 100 வயதைக் கடந்து நமக்கு வழிகாட்டியாக திகழ்கிறார். தமிழ்ச் சமுதாயத்துக்காக இன்னும் உழைக்கத் தயாராக இருக்கிறார். அவருக்கு அம்பேத்கர் விருதை கருணாநிதி வழங்கினார். நான் தகைசால் தமிழர் விருதை வழங்கினேன். அது எனக்கு கிடைத்த பெருமை. அம்பேத்கர் விருதை பெறும்போது தமிழக அரசு சார்பில் வழங்கப்பட்ட ரூ.1 லட்சத்தில் ரூ.50 ஆயிரத்தை கட்சிக்கும், ரூ.50 ஆயிரத்தை விவசாய சங்கத்துக்கும் கொடுத்துவிட்டார்.
அதேபோல தகைசால் தமிழர் விருதில் கிடைத்த 10 லட்ச ரூபாயுடன் ரூ. 5 ஆயிரம் சேர்த்து, ரூ.10 லட்சத்து 5 ஆயிரமாக தமிழக அரசுக்கே நிவாரண நிதியாக அளித்தார். அவரின் 80-ஆவது பிறந்தநாளின்போது, அன்றைய மாநிலச் செயலாளர் தா.பாண்டியன் உள்ளிட்டோர் திரட்டி தந்த ரூ.1 கோடியையும் கட்சிக்கே கொடுத்தவர் நல்லகண்ணு. இவ்வாறு, இயக்கம் வேறு தான் வேறு என்று நினைக்காமல், இயக்கத்துக்காகவே இயக்கமாவே வாழ்ந்து கொண்டிருக்கிறார்.
சாதியவாதம், வகுப்புவாதம், பெரும்பான்மைவாதம், எதேச்சாதிகாரம், மேலாதிக்கம் ஆகிய அனைத்துக்கும் எதிராக, ஜனநாயகச் சக்திகள் ஒற்றுமையுடன் பணியாற்றுவதுதான் நல்லகண்ணுக்கு நாம் வழங்கும் நூற்றாண்டு விழா பரிசு. இவ்வாறு முதல்வர் பேசினார்.
இந்திய கம்யூனிஸ்ட் கட்சி தேசிய செயலாளர் டி.ராஜா: நல்லகண்ணு தன்னலம் இல்லாத கடும் உழைப்பாளி. விவசாயிகளின் நலனுக்காகவும், ஏழைகளின் நலனுக்காகவும் பாடுபடுபவர். மக்கள், மாநிலம், நாடு, கட்சி இவற்றின் வளர்ச்சி பற்றிதான் அக்கறையோடு செயல்படுவார்.
மதிமுக பொதுச் செயலாளர் வைகோ: நல்லகண்ணுவை பார்த்து இளைஞர்கள் லட்சியவாதி ஆக வேண்டும். அவரது தியாக வரலாற்றை இளைஞர்கள் அறிந்து கொள்ள வேண்டும்.
கம்யூனிஸ்ட் கட்சி மாநில செயலாளர் முத்தரசன்: ஒரு கட்சி தொடங்கிய நாளும், ஒரு தலைவரின் பிறந்த நாளும் ஒரே தேதியில் அமையும் வாய்ப்பு எல்லாருக்கும் கிடைப்பதில்லை. அந்த வகையில், நல்லகண்ணுவுக்கு கிடைத்துள்ளது. அவரது நூற்றாண்டு விழா மாவட்ட வாரியாக ஓராண்டுக்கு நடைபெற உள்ளது. விழாவில், ஓய்வுபெற்ற சென்னை உயர் நீதிமன்ற நீதிபதி சந்துரு, மார்க்சிஸ்ட் கம்யூனிஸ்ட் கட்சியின் மூத்த தலைவர் டி.கே.ரங்கராஜன், மக்கள் இயக்கங்களின் தேசிய கூட்டமைப்பு நிறுவனர் மேதா பட்கர், தமிழக முன்னாள் தலைமை செயலாளர் வெ.இறையன்பு, சிந்துவெளி ஆய்வாளர் பாலகிருஷ்ணன், விஐடி பல்கலைக்கழக வேந்தர் கோ.விசுவநாதன், விஞ்ஞானி மயில்சாமி அண்ணாதுரை, சென்னைப் பல்கலைக்கழக முன்னாள் தமிழ்த்துறை தலைவர் வீ.அரசு, நடிகர் விஜய் சேதுபதி, மூத்த தொழிற்சங்க தலைவர் இரா.குசேலர், கவிஞர் வைரமுத்து, நடிகர் சிவகுமார் உள்ளிட்டோரும் பங்கேற்றனர்.
