-
-
-
Loading
சென்னை: பூந்தமல்லியில் உள்ள பார்வைத்திறன் குறைபாடு உடையோருக்கான அரசு தொழிற்பயிற்சி மையத்தில், நடப்பு கல்வியாண்டில் (2024-25) புத்தக பைண்டிங் படிப்புக்கான விண்ணப்பங்கள் வழங்கப்படவில்லை. இந்த படிப்பை நிறுத்த அரசு திட்டமிட்டுள்ளதாக கூறி பார்வைத்திறன் குறைபாடு உடையோருக்கான தேசிய கூட்டமைப்பின் சார்பில் சென்னை உயர் நீதிமன்றத்தில் வழக்கு தாக்கல் செய்யப்பட்டது. இந்த வழக்கை விசாரித்த உயர் நீதிமன்றம், இதுதொடர்பாக தமிழக அரசு தரப்பில் விளக்கமளிக்க உத்தரவி்ட்டிருந்தது.
இந்த வழக்கு தலைமை நீதிபதி கே.ஆர். ராம் மற்றும் நீதிபதி செந்தில்குமார் ராமமூர்த்தி ஆகியோர் அடங்கிய அமர்வில் மீண்டும் விசாரணைக்கு வந்தது. அப்போது மாநில அரசு ப்ளீடர் ஏ.எட்வின் பிரபாகர் ஆஜராகி, மாற்றுத் திறனாளிகள் நலத்துறை இயக்குநர் தரப்பில் அறிக்கை தாக்கல் செய்தார். அந்த அறிக்கையில், ‘பார்வைத்திறன் குறைபாடு உடையோரது கோரிக்கையை ஏற்று, புத்தக பைண்டிங் படிப்பை தொடர்ந்து நடத்துவது என முடிவு செய்யப்பட்டுள்ளது. வரும் ஜனவரி முதல் இந்த படிப்பை தொடங்கும் வகையில் விண்ணப்பங்கள் விநியோகிக்கப்பட்டு வருகிறது.
மேலும், டெலி மெடிசின், தகவல் தொழில்நுட்பம் மற்றும் மென்பொருள் வடிவமைப்பு போன்ற பயிற்சி வகுப்புகளையும் புதிதாக தொடங்க ஆலோசிக்கப்பட்டு வருகிறது’ என தெரிவிக்கப்பட்டது. அதை பதிவு செய்து கொண்ட நீதிபதிகள் வழக்கை முடித்து வைத்து உத்தரவிட்டுள்ளனர்.
