நாகூர் ஹனிபா நூற்றாண்டு பிறந்தநாள் விழா: முதல்வர் ஸ்டாலின் மரியாதை; பாடல் குறுந்தகடு வெளியீடு

சென்னை: இசை முரசு நாகூர் ஈ.எம்.ஹனிபா நூற்றாண்டு பிறந்தநாளையொட்டி, சென்னை அண்ணா அறிவாலயத்தில் அவரது படத்துக்கு முதல்வர் ஸ்டாலின் மரியாதை செலுத்தினார்.

‘இசை முரசு’ என போற்றப்படும் நாகூர் ஈ.எம்.ஹனிபாவின் நூற்றாண்டு பிறந்தநாள் நேற்று கொண்டாடப்பட்டது. இதையொட்டி, சென்னை அண்ணா அறிவாலயத்தில் அலங்கரித்து வைக்கப்பட்டிருந்த அவரது படத்துக்கு முதல்வர் ஸ்டாலின் மலர்தூவி மரியாதை செலுத்தினார்.

இதைத் தொடர்ந்து, தமிழகத்தின் நல்லிணக்க வரலாற்றுக்கு சான்றளிக்கும் விதமாக தயாரிக்கப்பட்டுள்ள ‘ஹபீபி’ என்ற திரைப்படத்தில் செயற்கை நுண்ணறிவு (ஏ.ஐ.) தொழில்நுட்பத்தில் உருவாக்கப்பட்ட காலத்தால் அழியாத நாகூர் ஹனிபாவின் கம்பீர குரலுடன் கூடிய பாடல் குறுந்தகட்டையும் முதல்வர் ஸ்டாலின் வெளியிட்டார்.

இந்த நிகழ்ச்சியில் திமுக பொதுச் செயலாளர் துரைமுருகன், துணை பொதுச் செயலாளர் ஆ.ராசா, அமைப்பு செயலாளர் ஆர்.எஸ்.பாரதி, செய்தி தொடர்பு தலைவர் டிகேஎஸ் இளங்கோவன், இணை அமைப்பு செயலாளர் அன்பகம் கலை, துணை அமைப்பு செயலாளர்கள் எஸ்.ஆஸ்டின், ப.தாயகம்கவி, தலைமை நிலைய அலுவலக செயலாளர்கள் பூச்சி எஸ்.முருகன், துறைமுகம் காஜா, திமுக கலை, இலக்கிய பகுத்தறிவு பேரவை செயலாளர் இறையன்பன் குத்தூஸ் மற்றும் ‘ஹபீபி’ திரைப்படத்தில் ஒரு பாடலுக்கு நடித்துள்ள இயக்குநர் கஸ்தூரிராஜா, பாடல்கள் எழுதிய கவிஞர் யுகபாரதி உள்ளிட்டோர் பங்கேற்றனர்.

தனது தனித்துவமான குரல் வளத்தாலும், பாடல் திறத்தாலும் உலகெங்கிலும் லட்சக்கணக்கான ரசிகர்களை பெற்றவர் நாகூர் ஹனிபா. நூற்றுக்கணக்கான இஸ்லாமிய பாடல்கள், திராவிட இயக்க பாடல்கள் உட்பட மற்றும் இதர பாடல்களையும் பாடி பெரும் புகழ்பெற்றவர். இவர் பாடிய ‘இறைவனிடம் கையேந்துங்கள்', ‘எல்லோரும் கொண்டாடுவோம்', ‘நட்ட நடு கடல் மீது’, ‘உன் மதமா என் மதமா’ போன்ற பாடல்களும், ‘அழைக்கின்றார், அழைக்கின்றார் அண்ணா’, ‘கல்லக்குடி கொண்ட கருணாநிதி வாழ்கவே’, ‘ஓடி வருகிறான் உதயசூரியன்’ போன்ற திமுக கட்சிப் பாடல்களும் மிகவும் பிரபலமானவை.

நீதிக்கட்சி, திராவிட இயக்கங்களின் வளர்ச்சியில் ஹனிபா பெரும் பங்காற்றினார். பட்டுக்கோட்டை அழகிரி, பெரியார், அண்ணா, கருணாநிதி, காயிதே மில்லத் ஆகியோரது அன்பையும் பெற்றவர். சட்டப்பேரவை மேலவை உறுப்பினராகவும் இருந்து மக்கள் பணியாற்றிய நாகூர் ஹனிபா கடந்த 2015 ஏப்ரல் 8-ம் தேதி காலமானார்.

முதல்வர் புகழாரம்​: முதல்வர் ஸ்டாலின் நேற்று வெளியிட்ட சமூக வலைதள பதிவில், ‘திமுகவின் கம்பீர குரல் இசை முரசு நாகூர் ஹனிபாவின் நூற்றாண்டில் அவரை போற்றுவோம், எல்லோரும் கொண்டாடுவோம். கருணாநிதியின் நண்பரும், ஆருயிர் சகோதரருமான ஹனிபா காலம் கடந்து வாழ்வார். கருணாநிதி நிறைந்திருக்கும் இடமெல்லாம் ஹனிபாவும் இருப்பார்’ என்று தெரிவித்துள்ளார்.