-
-
-
Loading
சென்னை: தமிழகத்தின் உரிமைகளை தரவில்லை என்றால், மத்திய அரசுக்கு தமிழக மக்கள் உரிய நேரத்தில் மீண்டும் தக்க பதிலடி கொடுப்பார்கள் என்று முதல்வர் மு.க.ஸ்டாலின் தெரிவித்துள்ளார். மேலும் நாடாளுமன்றத்தில் ஒட்டு மொத்த தமிழகத்தின் குரலாக திமுக எம்.பி.க்களின் ஒலித்ததாகவும் முதல்வர் கருத்து தெரிவித்துள்ளார்.
இதுகுறித்து அவர் நேற்று வெளியிட்ட அறிக்கையில் கூறியிருப்பதாவது: நாடாளுமன்ற குளிர்கால கூட்டத்தொடர் நவ.25 தொடங்கி, நேற்று (டிச.20) முடிவுற்றது. இத்தொடரில் வீறுகொண்ட வீரர்களாக திமுக எம்.பி.க்கள் முழங்கியுள்ளனர். திமுக எம்.பி.க்கள் செயல்பாடுகளை பார்த்து நாடே வியந்துள்ளது. தமிழக நலனுக்காக குரல் கொடுப்பது, உரிமைகள் தொடர்பான பிரச்சினைகளை எழுப்பி கவனத்தை ஈர்ப்பது என இரண்டையும் வெற்றிகரமாக செய்துள்ளனர்.
அதானி விவகாரம், மணிப்பூர் கலவரம் என நான் பொறுப்பேற்று பதில் சொல்ல வேண்டிய அனைத்திலும் மவுனம் காக்கும் பிரதமர், நாடாளுமன்றத்தில் பாஜகவினரால் ஜனநாயகம் படாதபாடு பட்டபோதும் வேடிக்கை பார்த்துக் கொண்டிருந்தார். அவையை நடத்த விரும்புவதை விட முடக்க வேண்டும் என்றே பாஜக எம்.பி.க்கள் செயல்பட்டதை காணமுடிந்தது.
அரசியல் சட்டத்தின் 75 ஆண்டு விழா கொண்டாட்டத்தின்போது, அச்சட்டத்தை உருவாக்கித் தந்த அண்ணல் அம்பேத்கரை மத்திய உள்துறை அமைச்சரே அவதூறு செய்து, இழிவுபடுத்தி பேசுவது பாஜகவின் உயர்வர்க்க பாசிச முகத்தை தோலுரித்துக் காட்டிவிட்டது.
‘ஒரே நாடு; ஒரே தேர்தல்' முறையை கடுமையாக எதிர்த்துப் பேசிய டி.ஆர். பாலு, மதுரை டங்ஸ்டன் கனிம சுரங்க அனுமதி, பேரிடர் மேலாண்மை 2024 திருத்தச் சட்டம் குறித்தும் அனல் பறக்கப் பேசிய கனிமொழி, அவைக்குப் பிரதமரே வருவதில்லை என்று முழங்கிய திருச்சி சிவா உள்ளிட்ட ஒவ்வொருவரும் ஒவ்வொரு விதத்தில் மத்திய அரசைத் தட்டி எழுப்பினர்.
தமிழக மக்கள் “நாற்பதுக்கு நாற்பது” என்ற தேர்தல் வெற்றியைத் தந்தபோது, “நாடாளுமன்றம் சென்று இவர்கள் என்ன செய்யப் போகின்றனர் என சிலர் கேள்வி எழுப்பினர். ஆனால் அவர்களெல்லாம் வாயடைத்துப் போகும் அளவுக்கு திமுக எம்.பி.க்களின் செயல்பாடு அமைந்துள்ளது. குறிப்பாக, இலங்கை ராணுவத்தால் கைது செய்யப்படும் தமிழக மீனவர்கள் விடுதலை, ரயில்வே திட்டங்கள், மெட்ரோ ரயில் திட்ட நிதி ஒதுக்கீடு, சமக்ர சிக்ஷா அபியான் திட்டநிதி, பி.எம். கிசான் திட்ட நிதி,
சுங்கச்சாவடிகளை ஒழித்தல், நீட் தேர்வு முறைகேடுகள், வக்பு வாரிய சட்டத்திருத்த எதிர்ப்பு, பேரிடர் மேலாண்மை நிதி ஒதுக்காதது. மதுரை எய்ம்ஸ் உள்ளிட்ட எண்ணற்ற திட்டங்களை, தமிழகத்தின் உரிமைகளை மற்ற மாநில எம்.பி.க்களை காட்டிலும் தமிழக எம்.பி.க்கள் எழுப்பினர்.
ஒட்டுமொத்தத் தமிழகத்தின் குரலாக திமுக எம்.பி.க்கள் சுட்டிக்காட்டிய பிரச்சினைகள், 'ஒரே நாடு; ஒரே தேர்தலை' ஆணித்தரமாக எதிர்த்த நாடாளுமன்றக் குரல்கள் எல்லாம் பிரதமர் மோடி தலைமையிலான மத்திய அரசின் செவிகளில் உரக்கவே விழுந்திருக்கும் என்ற நம்பிக்கை பிறந்திருக்கிறது. இதன்மூலம், மத்திய அரசு தொடர்ந்து, தமிழகத்தை ஓரவஞ்சனையுடன் நடத்த முடியாது என்ற செய்தியை நமது எம்.பி.க்கள் அழுத்தம் திருத்தமாக கூறியுள்ளனர்.
இனியும் மத்திய அரசு திருந்தவில்லை என்றால், தமிழகத்தின் உரிமைகளை தரவில்லை என்றால், தமிழக மக்கள் உரிய நேரத்தில் மீண்டும் தக்க பதிலடி கொடுப்பார்கள். இவ்வாறு அவர் தெரிவித்துள்ளார்.
