தகுதியற்ற பேருந்துகளுக்கு சான்று வழங்க கூடாது: தகவல் ஆணையம் உத்தரவு

சாலையில் இயக்குவதற்கு தகுதியற்ற பேருந்துகளுக்கு தகுதி சான்றிதழ் வழங்கப்பட கூடாது என்று போக்குவரத்து ஆணையருக்கு மாநில தகவல் ஆணையம் அறிவுறுத்தியுள்ளது.

திருப்பூர் மாவட்டத்தை சேர்ந்த அரசு பேருந்து ஓட்டுநர் கு.பாலதண்டபாணி. இவர், தமிழ்நாடு தகவல் ஆணையத்தில் தாக்கல் செய்த மேல்முறையீட்டு மனு தொடர்பான விசாரணைக்கு சமீபத்தில் ஆஜரானார். அவர் தனது வாதத்தில், ‘‘பெரும்பாலான அரசு பேருந்துகள் சாலையில் இயக்குவதற்கு தகுதியற்று உள்ளன. போக்குவரத்து துறை இதை முறையாக ஆய்வு செய்யாமல் பேருந்துகளுக்கு தகுதி சான்றிதழ் வழங்கிவிடுகிறது. இத்தகைய நடவடிக்கை, பொதுமக்களின் உயிரோடு தொடர்புடையது. இதுதொடர்பான வீடியோ காட்சிகளை காண்பிக்கவும் தயாராக இருக்கிறேன்’’ என்றார்.

இதை பதிவு செய்துகொண்ட மாநில தலைமை தகவல் ஆணையர் முகம்மது ஷகீல் அக்தர், ‘‘ஓட்டுநர் கூறிய தகவலின் தீவிரத் தன்மையை போக்குவரத்து ஆணையர் கவனத்தில் கொள்ள வேண்டும். சாலையில் இயக்கப்படுவதற்கு தகுதியற்ற பேருந்துகளுக்கு தகுதி சான்றிதழ் வழங்கப்படாத வகையில் உரிய நடவடிக்கை மேற்கொள்ள வேண்டும்’’ என்று உத்தரவிட்டார்.