குமரி சுற்றுலா தலத்தினை உலக தரத்திற்கு உயர்த்தும் வகையில் மேம்பாட்டு பணிகள்: சுற்றுலாத் துறை இயக்குனர் தகவல்

நாகர்கோவில்: கன்னியாகுமரி சுற்றுலா தலத்தினை உலக தரத்திற்கு உயர்த்தும் வகையில் மேம்பாட்டு பணிகள் நடைபெற்று வருவதாக சுற்றுலா தலங்களை ஆய்வு செய்த தமிழ்நாடு சுற்றுலாத் துறை இயக்குனர் ஷில்பா பிரபாகர் சதீஷ் கூறியுள்ளார்.

கன்னியாகுமரி சுற்றுலாத் துறை சார்பில் பூம்புகார் கப்பல் போக்குவரத்துக் கழகம், திருவள்ளுவர் சிலை, சூரிய உதயம் மற்றும் அஸ்தமன மையங்கள் உள்ளிட்ட சுற்றுலாத் தலங்களை தமிழ்நாடு சுற்றுலாத் துறை இயக்குனர் ஷில்பா பிரபாகர் சதீஷ், குமரி மாவட்ட ஆட்சியர் அழகு மீனா தலைமையில் பார்வையிட்டு ஆய்வு மேற்கொண்டனர்.

பின்னர் அவர் தெரிவிக்கையில்; ”கன்னியாகுமரி சுற்றுலா தலத்தினை உலக தரத்திற்கு உயர்த்தும் வகையில் பல்வேறு மேம்பாட்டு பணிகள் மேற்கொள்ளப்பட்டு வருகிறது. அதனடிப்படையில் கன்னியாகுமரி திருவள்ளுவர் சிலையில் நவீன லேசர் தொழில்நுட்ப திட்டத்தினை செயல்படுத்த ரூ.11.98 கோடி நிதி ஒதுக்கீடு செய்யப்பட்டு தமிழ்நாடு சுற்றுலா வளர்ச்சிக்கழகம், சென்னையின் மூலம் பூம்புகார் கப்பல் போக்குவரத்துக் கழக வளாகத்தின் அருகில் அமைந்துள்ள ஒலி மற்றும் ஒளி காட்சிக் கூடம் அமைக்கப்பட்டுள்ள இருக்கையில் அமர்ந்து திரையில் திருவள்ளுவர் சிலையில் அமைக்கப்பட்டுள்ள ஒளிரும் விளக்குகள் மற்றும் நிகழ்ச்சிகளை கண்டுகளிக்குமாறு அமைக்கப்பட்டுள்ளது.

இக்காட்சிக் கூடத்தில் 200 பேர் பார்வையாளர்களாக அமரும்படி உள்ளது. இந்தியாவின் தென்கோடியில் அமைந்துள்ள முக்கடலும் சங்கமிக்கும் ஒரு பிரசித்தி பெற்ற சர்வதேச சுற்றுலா தளம் கன்னியாகுமரியாகும். முன்னாள் முதல்வர் கருணாநிதியின் சீரிய முயற்சியினால் கடலின் நடுவில் அய்யன் திருவள்ளுவர் சிலை அமைக்கப்பட்டு, உலகத் தமிழர்களால் போற்றப்பட்டு வருவதோடு, திருவள்ளுவர் சிலைக்கு சென்று வர பூம்புகார் கப்பல் போக்குவரத்துக் கழகம் மூலம் படகு வசதி உள்ளதால் சுற்றுலாப் பயணிகளிடம் மேலும் சிறப்பு பெற்றுள்ளது என்றார்.

தொடர்ந்து திருவள்ளுவர் சிலை மற்றும் விவேகானந்தர் பாறையை இணைக்கும் கடல்சார் கண்ணாடி கூண்டு பாலம் அமைக்கும் பணியினை பார்வையிட்டு ஆய்வு மேற்கொள்ளப்பட்டது. மேலும் பணிகளை விரைந்து முடித்திட துறைசார்ந்த அலுவலர்களுக்கு அறிவுறுத்தினார். கன்னியாகுமரிக்கு வரும் வெளி நாடு, வெளி மாநிலம், வெளி மாவட்டம் மற்றும் உள்ளுர் சுற்றுலாப் பயணிகள் காலை சூரிய உதயம், மாலை சூரியன் அஸ்தமனம் ஆகியவற்றை கண்டு களிப்பதற்கு அப்பகுதிகளில் இருக்கை வசதிகள் ஏற்படுத்தி கொடுக்கவும், பாதுகாப்பான சுத்திகரிக்கப்பட்ட குடிநீர் வசதிகளை ஏற்படுத்திடவும், கழிப்பறைகளை சுகாதாரமாக பேணிடவும், கடற்கரை திரிவேணி சங்கமம் பகுதிகள், நீச்சல் குளம் அமைந்துள்ள பகுதிகளில் நிழற்குடைகள் அமைத்தும், குறிப்பாக சுற்றுலா வரும் குழந்தைகளுக்கு விளையாட்டு பூங்கா, சிறுவர் பூங்கா, சுனாமி பூங்கா ஆகியவற்றினை சீரமைத்து, பொழுதுபோக்கு விளையாட்டு பொருட்கள் அமைத்து பராமரித்திட உரிய நடவடிக்கை மேற்கொள்ள துறைசார்ந்த அலுவலர்களுக்கு அறிவுறுத்தப்பட்டது.

மேலும் கன்னியாகுமரி ரவுண்டானா முதல் காந்தி மண்டபம் வரையும், ரவுண்டானா முதல் சன்செட் பாயிண்ட் வரையும், ரவுண்டானா முதல் சீரோ பாயிண்ட் வரையும், காந்தி மண்டபம் முதல் சன்செட் பாயிண்ட் வரையும், ரவுண்டானா முதல் பகவதியம்மன் கோவில் வரையும், ரவுண்டானா முதல் விவேகானந்தபுரம் வரையும், விவேகானந்தபுரம் முதல் பழத்தோட்டம் வரைக்கும் எல்.இ.டி தெரு விளக்கு அமைக்கபட்டுள்ளதையும், உயர்கோபுர விளக்குகள் அமைத்து சுற்றுலா தலம் மெருகூட்டப்பட்டு வரும் பணிகளை பார்வையிட்டு ஆய்வு மேற்கொள்ளப்பட்டதோடு, திருவள்ளுவர் 25ம் ஆண்டு வெள்ளி விழாவிற்கு முன்பாக பணிகளை விரைந்து முடித்திட துறை சார்ந்த அலுவலர்களுக்கு அறிவுறுத்தப் பட்டுள்ளது.

திருவள்ளுவர் 25ம் ஆண்டு வெள்ளி விழாவினை காண வரும் சுற்றுலாப் பயணிகளுக்கு அவசர கால உதவிகள் குறித்து விபரங்களையும், வழிகாட்டி பதாகைகள் அமைத்திட வேண்டும். மேலும் கன்னியாகுமரிக்குட்பட்ட அனைத்து சுற்றுலாப் பகுதிகளிலும், குப்பைகள் தேங்காத வண்ணம் அவ்வப்போது தூய்மை பணியாளர்களை கொண்டு சுத்தம் செய்திடவும், தெரு நாய்களை கட்டுப்படுத்திட பேரூராட்சி செயல் அலுவலருக்கு அறிவுறுத்தப்பட்டுள்ளது. சுற்றுலா தளத்தில் உள்ள அனைத்து உணவகங்கள், சிற்றுண்டி கடைகள், தங்கும் விடுதிகள் மற்றும் விற்பனை நிலையங்களில் இருப்பு வைக்கப்பட்டுள்ள பொருட்களின் காலாவதி தேதி, தரம், அவற்றில் சேர்க்கப்பட்டுள்ள பொருட்களின் விவரங்களையும், தயாரிக்கப்படும் உணவுகளின் தரத்தினையும் சுகாதாரத்தினையும் உணவு பாதுகாப்பு அலுவலர்கள் ஆய்வு செய்து, உறுதி செய்திட வேண்டுமெனவும் ஷில்பா பிரபாகர் சதீஷ் அறிவுறுத்தினார்.

ஆய்வில் மாவட்ட வருவாய் அலுவலர் பாலசுப்பிரமணியம், உதவி ஆட்சியர் (பயிற்சி) சுஷ்ஸ்ரீ சுவாங்கி குந்தியா, மாவட்ட சுற்றுலா அலுவலர் காமராஜ், பொதுப்பணித் துறை உதவி செயற்பொறியாளர் (கட்டடம்) முருகேசன், விஜயலெட்சுமி (மின்னியல்), நெடுஞ்சாலைத் துறை செயற்பொறியாளர் பாஸ்கர், பூம்புகார் கப்பல் போக்குவரத்துக் கழக மேலாளர் சந்திரசேகர் மற்றும் துறை அலுவலர்கள் கலந்து கொண்டார்கள்.