இலங்கை கடற்படையினரால் 8 மீனவர்கள் சிறைபிடிப்பு

ராமேசுவரம்: நெடுந்தீவு அருகே மீன்பிடித்துக் கொண்டிருந்த ராமேசுவரம் மீனவர்கள் 8 பேரை இலங்கை கடற்படையினர் நேற்று சிறைபிடித்தனர்.

ராமேசுவரம் அருகே மண்டபம் வடக்கு மீன்பிடித் துறைமுகத்திலிருந்து நேற்று முன்தினம் 324 விசைப்படகுகளில் 1,600 மீனவர்கள் கடலுக்குச் சென்றனர். கார்த்திக் ராஜா, சகாய ஆண்ட்ரிஸ் ஆகியோருக்குச் சொந்தமான 2 விசைப்படகுகளில் சென்ற மீனவர்கள் நேற்று அதிகாலை நெடுந்தீவு அருகே மீன்பிடித்துக் கொண்டிருந்தனர்.

அப்போது, அங்கு வந்த இலங்கை கடற்படையினர், எல்லை தாண்டி வந்து மீன் பிடித்ததாகக் கூறி கண்ணன், காளி, முத்துராஜ், பத்ரப்பன், யாசின், சேசு, ராமகிருஷ்ணன், வேலு ஆகியோரைக் கைது செய்தனர். மேலும், இரு விசைப்படகுகளும் பறிமுதல் செய்யப்பட்டன.

கைது செய்யப்பட்ட மீனவர்கள் காங்கேசன்துறையில் உள்ள இலங்கை கடற்படை முகாமுக்கு அழைத்துச் செல்லப்பட்டு, பின்னர் ஊர்காவல்துறை நீதிபதி வீட்டில் ஆஜர்படுத்தப்பட்டனர். அவர்களை வரும் 20-ம் தேதி வரை யாழ்ப்பாணம் சிறையில் அடைக்க நீதிபதி ஷாலினி உத்தரவிட்டார்.