200 தொகுதிகளில் வெல்வோம் என இறுமாப்போடு சொல்கிறேன்: விஜய்க்கு கனிமொழி பதிலடி

தூத்துக்குடி: 2026 தேர்தலில் திமுக தலைவரும், தமிழ்நாடு முதலமைச்சருமான மு.க.ஸ்டாலின் சொல்வதுபோல 200 தொகுதிகளிலும் நாம் நிச்சயமாக வெற்றி பெறுவோம் என திமுக நாடாளுமன்றக்குழு தலைவர் கனிமொழி தெரிவித்துள்ளார்

திருச்செந்தூரில் நடைபெற்ற நிகழ்ச்சியில் பேசிய கனிமொழி, “2026 தேர்தல் வெற்றி என்பது உங்களின் கரங்களில் இருக்கிறது. இந்த கடமை உனர்வோடு பணியாற்றினால் வெற்றி நிச்சயம். திமுக தலைவரும், தமிழ்நாடு முதலமைச்சருமான மு.க.ஸ்டாலின் சொல்வதுபோல 200 தொகுதிகளிலும் நாம் நிச்சயமாக வெற்றி பெறுவோம். நானும் இறுமாப்போடு சொல்கிறேன் வெற்றி நிச்சயம், வெற்றி நிச்சயம்” என்று பேசினார்.

சென்னையில் நேற்று நடைபெற்ற ‘எல்லோருக்குமான அம்பேத்கர்’ என்ற புத்தக வெளியீட்டு விழாவில் தவெக தலைவர் விஜய் கலந்து கொண்டார். இந்த விழாவில் பேசிய விஜய், "மக்கள் உணர்வுகளை மதிக்கத் தெரியாத, அடிப்படை சமூக நீதியான பாதுகாப்பைக் கூட உறுதி செய்ய இயலாத கூட்டணிக் கணக்குகளை மட்டுமே நம்பி இருமாப்புடன் இருநூறு வெல்வோம் என எகத்தாளம் முழக்கமிடும் மக்கள் விரோத ஆட்சியாளர்களுக்கு என் மக்களோடு இணைந்து நான் விடும் எச்சரிக்கை, நீங்கள் உங்கள் சுயநலனுக்காகப் பல வழிகளில் பாதுகாத்துவரும் கூட்டணிக் கணக்குகள் அனைத்தும் 2026-ல், மக்களே மைனஸாக்கி விடுவார்கள்." என்று பேசியதும் சலசலப்பை உருவாக்கியது.

இதுதொடர்பாக வேலூரில் செய்தியாளர்களின் கேள்விக்கு பதிலளித்த தமிழக துணை முதல்வர் உதயநிதி ஸ்டாலின், “ நான் சினிமா செய்திகளை பார்ப்பதில்லை. யார் இங்கே பிறப்பால் முதல்வர் ஆனது? மக்கள் தேர்ந்தெடுத்துதான் முதல்வர் ஆனார். அந்த அறிவு கூட இல்லை அந்த ஆளுக்கு” என கோபமாக தெரிவித்தார்.