கழிவுநீர் கலந்த குடிநீரை குடித்த 2 பேர் உயிரிழப்பு: 24 பேருக்கு மருத்துவமனையில் சிகிச்சை

பல்லாவரம்: பல்லா​வரம் கன்டோன்​மென்ட், 6-வது வார்டு, மலைமேடு பகுதி​யில் வசிக்​கும் மக்களுக்கு ஒரு நாள் விட்டு ஒரு நாளும், தாம்​பரம் மாநக​ராட்சி 13-வது வார்டு, காமராஜர் நகரில் 3 நாட்​களுக்கு ஒரு முறை​யும் பாலாறு குடிநீர் விநியோகம் செய்​யப்​படுகிறது. இந்நிலை​யில், நேற்று முன் தினம் மலைமேடு பகுதி, காமராஜர் நகருக்கு, 3 நாட்​களுக்கு முன்னர் குடிநீர் விநியோகம் செய்யப்​பட்​டுள்​ளது. மற்ற நாட்களை காட்​டிலும் தற்போது விநியோகம் செய்​யப்​பட்ட குடிநீர் கழிவு நீர் கலந்து நிறம் மாறிய நிலையில் விநி​யோகம் செய்​யப்​பட்​டதாக கூறப்​படு​கிறது.

இந்நிலை​யில் நேற்று முன் தினம் இரவு அப்பகு​திகளை சேர்ந்த பலருக்கு வாந்தி, பேதி, மயக்கம் போன்ற பாதிப்புகள் ஏற்பட்டன. இதையடுத்து பாதிக்​கப்​பட்​ட​வர்கள் குரோம்​பேட்​டை​யில் உள்ள தாம்​பரம் அரசு மருத்​துவ​மனை​யில் சிகிச்சை பெற்​றனர். அங்கு, சிலர் முதலுதவி சிகிச்சை பெற்று வீடு திரும்​பினர். சிலர் உள்நோ​யாளியாக அனும​திக்​கப்​பட்​டனர். சிலர் தனியார் மருத்​துவ​மனை​யிலும், சென்னை​யில் அரசு மருத்​துவ​மனை​யிலும் சிகிச்சை பெற்று வருகின்​றனர்.

நேற்று காலை பலர் இதே பாதிப்பு​களால் தாம்​பரம் அரசு மருத்​துவ​மனை​யில் அனும​திக்​கப்​பட்​டனர். இதில், 18 பேர் முதலுதவி சிகிச்சை பெற்று வீடு திரும்​பினர். மருத்​துவ​மனை​யில் சிகிச்சை பெற்று வந்தவர்​களில் பல்லா​வரம் காமராஜர் நகரை சேர்ந்த திரு​வேதி (56), என்பவர் நேற்று முன்​தினம் உயிரிழந்​தார். கன்டோன்​மென்ட் பல்லா​வரம் மாரி​யம்மன் கோயில் தெருவை சேர்ந்த ஆட்டோ ஓட்டுநர் மோகனரங்கம் (47) நேற்று காலை சிகிச்சை பலனின்றி உயிரிழந்​தார். இவருக்கு லாவண்யா என்ற மனைவி, மகன், மகன் உள்ளனர்.

தொடர்ந்து தாம்​பரம் அரசு மருத்​துவ​மனை​யில் 19 பேரும், பல்லா​வரத்​தில் உள்ள தனியார் மருத்​துவ​மனை​யில் 5 பேரும் சிகிச்சை பெற்று வருகின்​றனர். 40-க்​கும் மேற்​பட்​டோர் பாதிப்​புக்கு உள்ளாகி​யுள்​ளனர் என்று தெரி​கிறது. இதையடுத்து தாம்​பரம் அரசு மருத்​துவ​மனைக்கு அமைச்​சர்கள் மா.சுப்​பிரமணி​யன், தா.மோ.அன்​பரசன், பல்லா​வரம் எம்எல்ஏ கருணாநிதி, செங்கை ஆட்சியர் அருண்​ராஜ், மாநக​ராட்சி அதிகாரி​கள், கன்டோன்​மென்ட் அதிகாரிகள் நேரில் சென்று விவரத்தை கேட்​டறிந்​தனர்.

தொடர்ந்து பாதிக்​கப்​பட்ட பகுதிகளில் விநியோகம் செய்​யப்​பட்ட குடிநீரை சுகா​தாரத் துறை அதிகாரிகள் ஆய்வு செய்​தனர். பின், குடிநீர் மாதிரிகளை எடுத்து பரிசோதனைக்காக கிங்இன்ஸ்​டிடியூட்டுக்கு அனுப்​பி​யுள்​ளனர். மருத்துவ குழு​வினர் முகாமிட்டு வீடு வீடாக சென்று மக்களுக்கு பரிசோதனை செய்து வருகின்​றனர்.

இதற்​கிடையே செங்கை மேற்கு, சென்னை புறநகர் அதிமுக மாவட்ட செயலா​ளர்கள் சிட்​லபாக்கம் ராஜேந்​திரன், பெருங்​குடி கே.பி. கந்தன், பல்லா​வரம் முன்​னாள் எம்.எல்.ஏ தன்சிங் ஆகியோர் பாதிக்​கப்​பட்​ட​வர்களை நேரில் சந்தித்து ஆறுதல் கூறினர்.