பிரதமர் மோடி அறிவித்த டபுள் என்ஜின் அரசால் மக்களுக்கு கெடுதல்தான்: சிபிஎம் ஜி.ராமகிருஷ்ணன் சாடல்

புதுச்சேரி: பிரதமர் மோடி பிரச்சாரத்தில் தெரிவித்த டபுன் என்ஜின் அரசால் மக்களுக்கு நன்மை இல்லை, கெடுதல் தான். மத்திய, மாநிலத்தில் ஒரே அரசாக இருப்பதால் புதுச்சேரி மக்கள் அதிகளவில் பாதிக்கப்பட்டுள்ளனர். புதுச்சேரி பரிசோதனை கூடமாக மாற்றப்பட்டுள்ளது என்று சிபிஎம் அரசியல் தலைமைக்குழு உறுப்பினர் ஜி. ராமகிருஷ்ணன் தெரிவித்தார்.

மார்க்சிஸ்ட் கம்யூனிஸ்ட் கட்சியின் புதுச்சேரி மாநில 24வது மாநாடு தொண்டர்கள் அணிவகுப்புடன் கொட்டும் மழையில் இன்று வில்லியனூரில் துவங்கியது. மாநாட்டு ஊர்வலத்திற்கு செயற்குழு உறுப்பினர் தமிழ்ச் செல்வன் தலைமை தாங்கினார். மூத்த தலைவர் சுதா சுந்தரராமன் பேரணியை துவக்கி வைத்தார் .

அதனைத் தொடர்ந்து கட்சியின் புதுச்சேரி நகர கமிட்டி சார்பில் செயற்குழு உறுப்பினர் கலியமூர்த்தி தலைமையில், ஜூலை 30 தியாகிகள் நினைவு சுடர் மாநாட்டு அரங்கத்திற்கு கொண்டுவரப்பட்டது. அதனை மூத்த தோழர் முருகன் பெற்றுக்கொண்டார். மாநாட்டு கொடியை மூத்த தோழர் தா.முருகன் ஏற்றி வைத்தார். தியாகிகளுக்கு அஞ்சலி செலுத்திய பின்னர் தோழர் சீதாராம் யெச்சூரி நினைவரங்கத்தில் துவங்கிய போது மாநாட்டிற்கு மாநில செயற்குழு உறுப்பினர் வெ.பெருமாள் தலைமை தாங்கினார்.

மார்க்சிஸ்ட் கம்யூனிஸ்ட் கட்சியின் மாநாட்டை துவக்கி வைத்து சிபிஎம்-ன் அரசியல் தலைமை குழு உறுப்பினர் ஜி.ராமகிருஷ்ணன் பேசுகையில், "மத்தியிலும், மாநிலத்திலும் ஒரே அரசு இருந்தால் டபுள் என்ஜின் அரசாக இருக்கும் என்று பிரதமர் மோடி தேர்தல் பிரச்சாரத்தில் தெரிவித்தார். டபுன் என்ஜின் அரசால் மக்களுக்கு நன்மை இல்லை, கெடுதல் தான்.

மத்திய, மாநிலத்தில் ஒரே அரசாக இருப்பதால் புதுச்சேரி மக்கள் அதிகளவில் பாதிக்கப்பட்டுள்ளனர். புதுச்சேரி பரிசோதனை கூடமாக மாற்றப்பட்டுள்ளது. ரேஷன்கடைகளை மூடியது, மின்துறை தனியார் மயமாக்குதல், ப்ரீபெய்டு மின் மீட்டர் பொருத்துதல், மின்கட்டணத்தை அதிகரித்தல் ஆகியவை உதாரணங்கள். எம்எல்ஏக்கள், எம்பிக்கள் இருப்பதை விட மக்கள் பிரச்சினைகளுக்கான போராடுவதே அரசியல் கட்சிகளுக்கு முக்கியம். மக்கள் பிரச்சினைகளை மத்திய அரசு கவனம் செலுத்தவில்லை. கார்ப்பரேட் அதிபர்களுக்கு வரியை மட்டும் ரத்து செய்கிறார்கள்’ என்று குறிப்பிட்டார்.

இந்நிகழ்வில் இந்திய கம்யூனிஸ்ட் கட்சியின் புதுச்சேரி மாநில செயலாளர் அ.மு.சலீம் சிபிஐ,எம்.எல் கட்சியின் மாநில செயலாளர் சோ. பாலசுப்பிரமணியன் ஆகியோர் மாநாட்டை வாழ்த்தி பேசினார்கள்.

மார்க்சிஸ்ட் கம்யூனிஸ்ட் கட்சியின் தமிழ் மாநில செயற்குழு உறுப்பினர் என். குணசேகரன், தமிழ் மாநில குழு உறுப்பினர் ஆறுமுக நயினார், புதுச்சேரி மாநில செயலாளர் ராஜாங்கம் உள்ளிட்ட நூற்றுக்கும் மேற்பட்ட பிரதிநிதிகள் உள்ளிட்ட தலைவர்கள் மாநாட்டில் பங்கேற்றனர். தொடர்ந்து நாளை ஞாயிற்றுக்கிழமை வரை மாநாடு நடைபெறுகிறது. மாநாட்டில் புதுச்சேரி மாநில புதிய செயலாளர் உள்ளிட்ட மாநில நிர்வாகிகள் தேர்வு செய்யப்பட உள்ளனர்.