துணை முதல்வர் உதயநிதி பிறந்தநாள்: செல்வப்பெருந்தகை வாழ்த்து

சென்னை: ஆக்கப்பூர்வமான பணிகளை தொடர்ந்து சிறப்பாக மேற்கொண்டு வரும் உதயநிதி ஸ்டாலினின் பணி சிறக்க வாழ்த்துகிறேன் என தமிழ்நாடு காங்கிரஸ் கமிட்டி தலைவர் செல்வப்பெருந்தகை கூறியுள்ளார்.

துணை முதல்வர் உதயநிதி ஸ்டாலினின் பிறந்தநாளையொட்டி செல்வப்பெருந்தகை வெளியிட்டுள்ள அறிக்கையில்: "கருணாநிதியிடம் 50 ஆண்டுகளுக்கும் மேலாக பயிற்சி பெற்று திமுக தலைவராகவும், தமிழக முதல்வராகவும் மிகச் சிறப்பாக செயல்பட்டு வருகிற ஸ்டாலின், அவர் ஏற்றுக் கொண்ட பணிகளை பகிர்ந்து கொள்கிற வகையில் ஆட்சியிலும், கட்சியிலும் பொறுப்புகளை வகித்து மிகச் சிறப்பாக செயல்பட்டு வரும் துணை முதல்வர் உதயநிதி ஸ்டாலினின் பிறந்தநாளில் தமிழ்நாடு காங்கிரஸ் சார்பாக மனதார வாழ்த்துகிறேன்.

திமுக-வின் இளைஞரணி செயலாளராக பொறுப்பேற்று, தமிழகம் முழுவதும் பயிற்சி பாசறைகளை நடத்தி, இளைஞர்களை ஈர்த்த பெருமை உதயநிதி ஸ்டாலினுக்கு உண்டு. அதேபோல, விளையாட்டுத்துறை என்பது நகரங்களில் மட்டுமே என்பது மாறி கிராமப்புற விளையாட்டுகளையும் ஈர்க்கின்ற வகையில், பல்வேறு நடவடிக்கைகளை எடுத்து வருபவர்.

இவரது பணியின் மூலம் விளையாட்டுத்துறையில் இளைஞர்களின் பங்களிப்பு அதிகமாகி வருகிறது. இத்தகைய ஆக்கப்பூர்வமான பணிகளை தொடர்ந்து சிறப்பாக மேற்கொண்டு வரும் உதயநிதி ஸ்டாலினின் பணி சிறக்க வாழ்த்துகிறேன்" என்று செல்வப் பெருந்தகை கூறியுள்ளார்.