தஞ்சாவூர் தமிழ் பல்கலைக்கழக துணைவேந்தர் சஸ்பெண்ட் செய்​யப்​பட்டது ஏன்? - ஆளுநர் உத்தர​வின் முழு விவரம்

சென்னை: தஞ்சை தமிழ்ப் பல்கலைக்கழக துணைவேந்தர் வி.திரு​வள்ளுவன் சஸ்பெண்ட் செய்யப்பட்டது ஏன் என்பது தொடர்பான ஆளுநர் உத்தரவின் முழு விவரம் வெளிவந்​துள்ளது.

துணைவேந்தர் திருவள்​ளுவனின் பதவிக்​காலம் டிச. 12-ல் முடிவடையும் நிலையில், அவரை சஸ்பெண்ட் செய்து ஆளுநர் ஆர்.என்.ரவி உத்தர​விட்​டுள்​ளார். இந்த உத்தரவில் கூறியிருப்பதாவது:

தமிழ்ப் பல்கலை.யில் 2017, 2018-ம் ஆண்டு​களில் விதிகளை மீறி பேராசிரியர்கள், இணை பேராசிரியர்கள், உதவிப் பேராசிரியர்கள் நியமிக்​கப்​பட்​டிருப்பதாக பல்கலை. வேந்தருக்கு புகார்கள் வந்தன. அவற்றின் மீது விசாரணை நடத்த​வும், சம்பந்​தப்பட்ட ஆசிரியர்​களின் கல்வித் தகுதியை ஆய்வு செய்யவும் நிபுணர் குழுவை அமைக்​குமாறு துணைவேந்​தருக்கு, பல்கலை. வேந்தர் உத்தர​விட்​டார். இதையடுத்து அமைக்கப் பட்ட நிபுணர் குழுவின் அறிக்கையை 2021 ஆக. 11-ம் தேதி வேந்தரிடம் சமர்ப்​பித்தார் துணை வேந்தர். விதிகளை மீறி ஆசிரியர் நியமனம் நடந்திருப்பது அந்த அறிக்கையில் சுட்டிக்​காட்டப் பட்டிருந்தது. இதற்குக் காரணமானவர்கள் மீது உரிய நடவடிக்கை எடுக்​குமாறு வேந்தர் உத்தர​விட்​டார். இதையடுத்து துணைவேந்தர் ஓர் அறிக்கை சமர்ப்​பித்​தார்.

ஆனால், முறைகேடான நியமனம் தொடர்பாக நடவடிக்கை எடுக்க வேண்டிய கடமையில் இருந்து துணைவேந்தர் தவறிவிட்​டார். இந்தப் பிரச்சினை தொடர்பாக நீதிமன்​றத்தில் பொது நலன் வழக்குகள் நிலுவையில் உள்ள நிலையில், துணைவேந்தர் திருவள்​ளுவன் உரிய நடவடிக்கை எடுப்​ப​தற்குப் பதிலாக, சம்பந்​தப்பட்ட ஆசிரியர்​களுக்கு 27.10.2023 அன்று தகுதி காண்பருவ நிறைவு வழங்கி​யுள்​ளார்.

ஆசிரியர் நியமன முறைகேடு தொடர்பாக நடவடிக்கை எடுக்​காதது ஏன் என்று கேட்டும், 15 நாட்களில் விளக்கம் அளிக்​கு​மாறும் துணைவேந்​தருக்கு கடந்த அக். 3-ம் தேதி நோட்டீஸ் அனுப்​பப்​பட்டது. அதற்கு அக். 16-ம் தேதி பதில் அளித்த துணை வேந்தர், நோட்டீஸ் குறித்து விளக்கம் அளிப்​ப​தாகக் கூறியுள்​ளார். அவர் அளித்த விளக்கம் மற்றும் ஆதாரங்​களின் அடிப்​படை​யில், சட்டவிரோத நியமனம் தொடர்பாக துணைவேந்தர் எந்த நடவடிக்கையும் எடுக்க​வில்லை என்பதும், விதிளை மீறி அந்த ஆசிரியர்​களுக்கு தகுதிகாண் பருவ நிறைவு வழங்கியதும் தெரிய​வரு​கிறது. எனவே, இந்த விவகாரம் குறித்து முழுமையான விசாரணை நடத்தப்பட வேண்டும் என்று வேந்தர் கருதுகிறார். இந்த சட்ட விரோத நியமனத்தில் பாரபட்​சமில்லாத விசாரணை நடைபெற வேண்டி​யுள்ள​தால், பல்கலை. துணைவேந்தர் வி.திரு​வள்​ளுவன் உடனடியாக சஸ்பெண்ட் செய்யப்​படு​கிறார்.

மேலும், 2017, 2018-ம் ஆண்டு​களில் 40 பேராசிரியர்கள், இணை பேராசிரியர்கள், உதவிப் பேராசிரியர்கள் விதிகளை மீறி நியமனம் செய்யப்​பட்டது குறித்து விசாரணை நடத்த சென்னை உயர் நீதிமன்ற முன்னாள் நீதிபதி எம்.ஜெயச்​சந்​திரன் நியமிக்​கப்​படு​கிறார். இவ்வாறு உத்​தரவில் தெரிவிக்​கப்​பட்​டுள்​ளது.