உடுமலை அருகே வனப்பகுதியில் மர்மமான முறையில் இறந்த ஆண் யானை!

உடுமலை: உடுமலை அருகே வனப்பகுதிக்குள் மர்மமான முறையில் இறந்து கிடந்த 5 வயது மதிக்கதக்க ஆண் யானையின் சடலம் மீட்கப்பட்டுள்ளது.

இதுகுறித்து வனத்துறையினர் கூறியதாவது: “ஆனைமலை புலிகள் காப்பகத்துக்கு உட்பட்ட உடுமலை வனச்சரகம், ஈசல் திட்டு வனப்பகுதியில் வனத்துறையினர் ரோந்து சென்றனர். அப்போது 5 வயது மதிக்கத்தக்க ஆண் யானை குட்டி ஒன்று அழுகிய நிலையில் சடலமாக கிடந்தது கண்டுபிடிக்கப்பட்டது.

மாவட்ட வன அலுவலர் தேவேந்திரகுமார் மீனா உத்தரவின் பேரில் மாவட்ட வன அலுவலர் (பயிற்சி) கீதா மேற்பார்வையில் , உடுமலை வனச்சரக அலுவலர் மணிகண்டன் மற்றும் வனத்துறையினர் சம்பவ இடத்தில் ஆய்வு மேற்கொண்டனர்.கால்நடை மருத்துவர் விஜயராகவன் குழுவினர் அதே இடத்தில் பிரேத பரிசோதனை மேற்கொண்டனர். அதில் யானைகளுக்கு இடையே நடைபெற்ற மோதலில் உள் காயம் ஏற்பட்டு அல்லது கீழே விழுந்ததில் காயம் ஏற்பட்டு இறந்திருக்கலாம் என கருதப்படுகிறது. இதுகுறித்து வனத்துறையினர் தொடர்ந்து விசாரித்து வருகின்றனர்” என்றார்.