நலவாரியத்தில் பதிவு செய்துள்ள கட்டுமான தொழிலாளர்களை வீட்டுவசதி திட்டத்தில் அதிக அளவில் சேர்க்க வேண்டும்: அமைச்சர் சி.வி.கணேசன்

சென்னை: கட்டுமானத் தொழிலாளர் நலவாரியத்தில் பதிவுசெய்த தொழிலாளர்களை, வீட்டுவசதித் திட்டத்தில் அதிகளவில் சேர்க்கும்படி, அமைச்சர் சி.வெ.கணேசன் உத்தரவிட்டுள்ளார்.

சென்னை, தலைமைச் செயலகத்தில் தொழிலாளர் நலன் மற்றும் திறன் மேம்பாட்டுத் துறை அமைச்சர் சி.வெ.கணேசன் தலைமையில் தமிழ்நாடு கட்டுமானத் தொழிலாளர்கள் நலவாரிய பணிகள் குறித்து ஆய்வுக் கூட்டம் நடந்தது.

இதில் அமைச்சர் பேசியதாவது: தொழிலாளர் நலத்துறையின்கீழ் செயல்பட்டு வரும் தமிழ்நாடு கட்டுமானத் தொழிலாளர் நலவாரியத்தில் பல்வேறு நலத்திட்டங்கள் செயல்படுத்தப்பட்டு வருகின்றன. குறிப்பாக, நலவாரியத்தில் பதிவுபெற்ற தொழிலாளர்கள் வீடு கட்டிக் கொள்வதற்கு அல்லது தமிழ்நாடு நகர்ப்புற வாழ்விட மேம்பாடு வாரியத்தால் கட்டப்பட்ட குடியிருப்புகளை சொந்தமாக ஒதுக்கீடு பெறுவதற்கு ரூ.4 லட்சம் வரை நிதியுதவி வழங்கப்படுகிறது. இந்த வீட்டுவசதி திட்டத்தில் கட்டுமானத் தொழிலாளர்கள் பயனடையும் வகையில், அதிகளவில் பயனாளிகளை மாவட்டம்தோறும் சேர்க்க, உரிய நடவடிக்கைகளை எடுக்க வேண்டும். இவ்வாறு அவர் பேசினார்.

கூட்டத்தில், தொழிலாளர் ஆணையர் அதுல் ஆனந்த், தொழிலாளர் நலத்துறை செயலர் கொ.வீரராகவராவ் , தமிழ்நாடு கட்டுமான வாரிய செயலாளர் க.ஜெயபால் மற்றும் துறை அலுவலர்கள் பங்கேற்றனர். இவ்வாறு அதில் கூறப்பட்டுள்ளது.