ஆஸ்திரேலியாவில் சபாநாயகர்கள் மாநாடு: ஆலோசனைக் கூட்டத்தில் புதுவை சபாநாயகர் பங்கேற்பு

புதுச்சேரி: ஆஸ்திரேலியாவில் நடைபெறும் சபாநாயகர்கள் மாநாட்டில் பங்கேற்கச் சென்றுள்ள புதுச்சேரி சபாநாயகர் செல்வம், இன்று நடந்த இந்திய மாநிலங்களின் சபாநாயகர்கள் ஆலோசனைக் கூட்டத்தில் பங்கேற்றதாக கூறினார்.

ஆஸ்திரேலியாவில் சிட்னி நகரில் 67-வது காமன் வெல்த் நாடுகளின் சபாநாயகர்கள் மாநாடு நடக்கிறது. இதில் பங்கேற்க புதுச்சேரி சபாநாயகர் செல்வம் சிட்னி சென்றுள்ளார்.

மாநாட்டில் இன்று இந்திய மாநிலங்களின் சபாநாயகர்கள் ஆலோசனைக் கூட்டத்தில் பங்கேற்றுள்ள புதுச்சேரி சபாநாயகர் செல்வம் அதுபற்றி கூறியதாவது: "ஆஸ்திரேலியாவில் சிட்னியில் 67வது காமன் வெல்த் நாடுகளின் சபாநாயகர்கள் மாநாடு நடக்கிறது. இதில் வரும் 7ம் தேதியன்று காமன் வெல்த் நாடாளுமன்ற கூட்டமைப்பிற்கான தேர்தல் நடக்கிறது.

இதற்காக இன்று காமன் வெல்த் நாடாளுமன்ற கூட்டமைப்பின் பொருளாளரும், இந்திய நாட்டின் பிரதிநிதியும் நாடாளுமன்ற உறுப்பினருமான அனுராக் ஷர்மா தலைமையில் இந்திய மாநிலங்களின் சபாநாயகர்கள் ஆலோசனைக் கூட்டம் சிட்னியில் நடந்தது. அதில் பங்கேற்றோம். முன்னதாக, சிட்னி நகரில் உள்ள இந்திய தூதரகத்தில் இந்தியன் கவுன்சில் ஜெனரல் டாக்டர் ஜானகிராமனை மரியாதை நிமித்தமாக சந்தித்தோம்" என்று சபாநாயகர் செல்வம் கூற்னார்.