“கடவுள், மத நம்பிக்கையை அரசியலோடு சேர்க்க கூடாது” - கார்த்தி சிதம்பரம் எம்.பி.

மானாமதுரை: ‘கடவுள், மதம் தனிப்பட்ட நம்பிக்கை, அதை அரசியலோடு சேர்க்க கூடாது’ என கார்த்தி சிதம்பரம் எம்பி கூறியுள்ளார்.

மக்களவைத் தேர்தல் வெற்றிக்காக சிவகங்கை மாவட்டம் மானாமதுரை பகுதி வாக்காளர்களுக்கு கார்த்தி சிதம்பரம் நன்றி தெரிவித்தார். மாவட்ட காங்கிரஸ் தலைவர் சஞ்சய் காந்தி உள்ளிட்டோர் உடனிருந்தனர்.

பின்னர் கார்த்தி சிதம்பரம் செய்தியாளர்களிடம் கூறியது: "கடவுள், மதம் தனிப்பட்ட நம்பிக்கை, அதை அரசியலோடு சேர்க்கக் கூடாது. இதை உச்ச நீதிமன்றம் வலியுறுத்தியதை வரவேற்கிறேன். காவிரி பிரச்சினையை பொறுத்தவரை 2 மாநிலங்கள் சேர்ந்து பேசி முடிக்கலாம். இல்லாவிட்டால் காவிரி மேலாண்மை வாரியத்தை அணுகலாம். அங்கும் முடியாவிட்டால் உச்சநீதிமன்றத்தை நாடலாம். இதன் மூலம் எப்படியும் தமிழகம் தண்ணீர் கிடைக்கும்.

மேலும், இப்பிரச்சினையில் தமிழக அரசு எடுக்கும் முடிவுக்கு அனைத்து கட்சிகளும் ஆதரவாக இருக்கும். கூவாம் நதி மறுசீரமைப்பு திட்டம் குறித்து சென்னை மேயரிடம் வெள்ளை அறிக்கை கேட்டுள்ளேன். இதுவரை வரவில்லை. நம்பிக்கையுடன் காத்திருக்கிறேன்" என்று கார்த்தி சிதம்பரம் கூறினார்.