ஹெலிகாப்டர் விபத்து: ட்ரோன், வரைபடம் கொண்டு ஆய்வு

குன்னூர் அருகே ஹெலிகாப்டர் விபத்து நடந்த இடத்தை, விமானப் படை அதிகாரிகள் மற்றும் போலீஸார் தீவிர ஆய்வு மேற்கொண்டு தடயங்களைச் சேகரிக்கும் பணியில் ஈடுபட்டுள்ளனர்.

நீலகிரி மாவட்டம், குன்னூர் நஞ்சப்பா சத்திரம் பகுதியில் நடந்த ஹெலிகாப்டர் விபத்தில் முப்படை தலைமைத் தளபதி பிபின் ராவத் உட்பட 13 பேர் உயிரிழந்தனர். விபத்து நடந்த பகுதி, விமானப் படையின் கட்டுப்பாட்டுக்குள் கொண்டுவரப்பட்டு, தீவிர ஆய்வு நடத்தி விசாரணை நடந்து வருகிறது.

விமானப்படை ஏர் மார்ஷல் மன்வேந்திர சிங் தலைமையிலான விமானப்படை குழுவினர், தொடர்ந்து ஆய்வு நடத்தி வருகின்றனர். ஏற்கெனவே கருப்புப் பெட்டி எடுத்துச் செல்லப்பட்டுள்ளது. ஹெலிகாப்டர் விழுந்த இடங்களில் உள்ள பொருட்களைச் சேகரித்து, பதிவு செய்யும் பணி நடந்தது.

விபத்து ஏற்பட்ட பகுதியில் தனியார் எஸ்டேட், ஹெலிகாப்டர் விழுந்த இடம், சாலைப் பகுதி, தாழ்வாக உள்ள இடம், வனப் பகுதி குறித்த வரைபடத்தை வைத்து ஆய்வுகள் மேற்கொண்ட வருவாய் துறையினர், விமானப்படை விசாரணை குழுவுக்கு விளக்கம் அளித்தனர்.

விமானப்படைக் குழுவினர், மெட்ராஸ் ரெஜிமென்ட் சென்டர் கமாண்டன்ட் ராஜேஸ்வர் சிங், நீலகிரி மாவட்ட காவல் துறை கண்காணிப்பாளர் ஆஷிஸ் ராவத் ஆகியோர், அந்தப் பகுதியை தங்களது கட்டுப்பாட்டில் கொண்டுவந்து 2-வது நாளும் தீவிரமாக ஆய்வு செய்தனர்.

விபத்து நிகழ்ந்த பகுதி மற்றும் சுற்றுவட்டாரத்தில் சுமார் 5 கிமீ தூரத்துக்கு ஹெலிகாப்டர் வந்த திசை, எதிர்திசை என 4 புறங்களிலும் 2 ட்ரோன்களை கொண்டு வீடியோ பதிவு மேற்கொள்ளப்பட்டது. இதில் ஹெலிகாப்டர் பாகங்கள் சிதறிக் கிடப்பது தெரியவந்தது. அதைச் சேகரிக்கும் பணியில் அதிகாரிகள் ஈடுபட்டுள்ளனர்.

வரைபடம் மூலம் நடந்த ஆய்வின் அடிப்படையிலும், ஹெலிகாப்டர் பயணித்த வழித்தடம், அந்தப் பகுதியில் உள்ள பாகங்கள், தடயங்கள் ஏதும் உள்ளதா என்பது குறித்தும் ஆய்வு நடத்துகின்றனர். மேலும் இந்தப் பகுதி வீடுகளில் உள்ள மக்களின் கணக்கெடுப்பும் நடத்தப்பட்டுள்ளது. பனிமூட்டம் காரணமாக முறையாக வீடியோ பதிவு மேற்கொள்வதில் சிரமம் ஏற்பட்டிருப்பதாகச் சொல்லப்படுகிறது.

இந்த வீடியோ பதிவை முப்பரிமாணமாக மாற்றி ஆய்வு மற்றும் விசாரணை மேற்கொள்ளவும் விமானப் படையினர் திட்டமிட்டுள்ளனர்.