தெய்வக் குழந்தைகளின் தெய்வீகத் தீபாவளி!

கே.கே.மகேஷ்

தீபாவளி நாளின் இரவு வானம் போல, மாணவி மேகலாவின் முகத்தில் அத்தனை வண்ணங்கள். கண், கன்னம், இதழ்கள் எல்லாம் விரிய, நெற்றிப்புருவமும்கூட சிரித்தது. காதுகள் கூட விடைத்துக்கொண்டது போல தோன்றியது. ஒட்டுமொத்த தீபாவளியின் சந்தோஷத்தையும் அந்தப் பார்வையற்ற மாற்றுத்திறனாளியின் முகத்தைப் பார்த்தே தெரிந்துகொள்ளலாம் போல.

பண்டிகைகள் என்றாலே குழந்தைகளுக்குக் கொண்டாட்டம்தான். அதுவும் தீபாவளிக்கு மட்டுமே புதுசு உடுத்தும் குழந்தைகளின் சந்தோஷத்தைக் கேட்கவும் வேண்டுமா? அப்படியான குழந்தைகளின் மகிழ்ச்சியை எழுத்தில் பதிவு செய்வது இயலாத காரியம் என்றாலும், முயன்றுதான் பார்ப்போமே என்று களமிறங்கியபோதுதான் மேகலாவைச் சந்தித்தேன்.

மதுரை பைக்காராவில் உள்ள பார்வையற்ற மாணவ, மாணவிகளுக்கான ‘தூய்மை விழிகள்' இல்லத்தில் தங்கியிருக்கும் மேகலாவிடம், “உங்க தீபாவளி சந்தோஷத்தை அப்படியே வார்த்தையில் சொல்லலாமா?” என்று கேட்டேன்.