‘அசைக்க முடியாத ஆல்-ரவுண்டர்’ - யார் இந்த ரவிச்சந்திரன் அஸ்வின்?

சென்னை: சர்வதேச கிரிக்கெட் போட்டிகளில் இருந்து ஓய்வு பெறுவதாக இந்தியாவின் ரவிச்சந்திரன் அஸ்வின் அறிவித்துள்ளார். அவர் செய்த சாதனைகள் என்னவென்று பார்ப்போம்.

இந்தியா - ஆஸ்திரேலியா இடையில், 5 போட்டிகள் கொண்ட டெஸ்ட் தொடர் ஆஸ்திரேலியாவில் நடைபெற்று வருகிறது. காபாவில் நடந்த மூன்றாவது டெஸ்ட் போட்டி டிரா ஆன நிலையில், அந்தப் போட்டியுடன் சர்வதேச கிரிக்கெட்டில் இருந்து ஓய்வு பெறுவதாக ரவிச்சந்திரன் அஸ்வின் அறிவித்துள்ளார்.

இது தொடர்பாக பேசிய அஸ்வின், “அனைத்து வகையான சர்வதேச கிரிக்கெட் போட்டிகளிலும் இதுதான் எனது கடைசி நாள். ஒரு கிரிக்கெட்டராக எனக்குள் இன்னும் திறமை இருப்பதாகவே உணர்கிறேன். ஆனாலும், க்ளப் அளவிலான கிரிக்கெட்டில் அதைக் காட்ட விரும்புகிறேன். சர்வதேச கிரிக்கெட்டில் இன்றுதான் எனது கடைசி நாள்" காபா டெஸ்டை தொடர்ந்து செய்தியாளர்களிடம் அஸ்வின் தெரிவித்தார்.

38 வயதான அஸ்வின் 106 டெஸ்ட் போட்டிகளில் விளையாடி 537 விக்கெட்டுகளை எடுத்துள்ளார். டெஸ்டில் அவர், 8 முறை ஒரே போட்டியில் 10 விக்கெட்டுகளை எடுத்துள்ளார், 37 முறை 5 விக்கெட்டுகளை வீழ்த்தியுள்ளார். ஆறு முறை சதம் அடித்துள்ள அஸ்வின், 14 முறை அரை சதம் அடித்துள்ளார்.

சமீபத்தில் வங்கதேசத்துக்கு எதிராக சென்னையில் நடந்த போட்டியில் இந்திய அணி 80 ரன்களுக்கு 6 விக்கெட்டுகளை இழந்து தவித்தபோது சதம் விளாசி அணியைக் காப்பாற்றி வெற்றி பெற உதவினார் அஸ்வின்.

106 டெஸ்ட் போட்டிகளில் 537 விக்கெட்டுகளை வீழ்த்தி, சர்வதேச டெஸ்ட் போட்டியில் அதிக விக்கெட்டுகளை வீழ்த்திய இந்தியர்கள் பட்டியலில் அனில் கும்ப்ளேவுக்கு பின் 2 ஆவது இடத்தை பிடித்துள்ளார். மேலும் 500 விக்கெட்டுகளுக்கு மேல் வீழ்த்திய சர்வதேச வீரர்கள் பட்டியலில் அஸ்வின் 7 ஆவது இடத்தில் உள்ளார்.

106 டெஸ்ட், 116 ஒரு நாள், 65 டி20 போட்டிகளில் விளையாடியுள்ள அஸ்வின் 765 விக்கெட்டுகளையும், 4,394 ரன்களையும் எடுத்துள்ளார். மேலும் டெஸ்ட் கிரிக்கெட்டில் அதிக தொடர்நாயகன் விருதுகள் வென்ற வீரர் என்ற முத்தையா முரளிதரன் உலக சாதனையையும் அஸ்வின் சமீபத்தில் சமன் செய்தார். அஸ்வின் தனது கேரியரில் 11 தொடர்நாயகன் விருதுகளை வென்றுள்ளார். இதன் வாயிலாக டெஸ்ட் கிரிக்கெட்டில் அதிக தொடர் நாயகன் விருதுகள் வென்ற வீரர் என்ற இலங்கை ஜாம்பவான் முத்தையா முரளிதரனின் வாழ்நாள் உலக சாதனையை அஸ்வின் சமன் செய்துள்ளார்.

சொல்லப்போனால் 60 தொடர்களில் முரளிதரன் வென்ற 11 தொடர்நாயகன் விருதுகளை, அஸ்வின் 21 தொடர்கள் குறைவாக வெறும் 39 தொடர்களிலேயே வென்று உலக சாதனையை சமன் செய்துள்ளார். சர்வதேச கிரிக்கெட்டிலிருந்து ஓய்வு பெற்றாலும், ஐபிஎல் உள்ளிட்ட கிளப் கிரிக்கெட் போட்டிகளில் விளையாடுவதாக அஸ்வின் தெரிவித்துள்ளார்.

தற்போது ஐசிசி தரவரிசைப் பட்டியலில் டெஸ்ட் கிரிக்கெட் பந்துவீச்சாளர்கள் பட்டியலில் 5 வது இடத்திலும், ஆல்ரவுண்டர் பட்டியலில் 3 வது இடத்திலும் அஸ்வின் உள்ளார்.