புரோ கபடி லீக் | இன்று பெங்களூரு - ஜெய்ப்பூர், டெல்லி-புனேரி அணிகள் மோதல்!

ஐதராபாத்தில் அக்டோபர் 18ம் தேதி 11வது புரோ கபடி லீக் தொடர் தொடங்கிய நிலையில் இந்த தொடரின் முதற்கட்ட லீக் போட்டிகள் ஐதராபாத்தில் நடந்து முடிந்தன.

இதனையடுத்து தற்போது புரோ கபடி லீக் தொடரின் 2வது கட்ட லீக் போட்டிகள் நொய்டாவில் நடந்து வருகிறது.

இந்த தொடரில் நேற்றிரவு நடைபெற்ற முதல் போட்டியில் குஜராத் ஜெயன்ட்ஸ் – பாட்னா பைரேட்ஸ் அணிகள் மோதின. தொடக்கம் முதலே போட்டியில் ஆதிக்கம் செலுத்தி வந்த பாட்னா பைரேட்ஸ் அணி 40-27 என்ற புள்ளிக்கணக்கில் குஜராத் ஜெயன்ட்ஸை எளிதில் வீழ்த்தி வெற்றி பெற்றது.

இதனைத் தொடர்ந்து நடந்த 2வது லீக் போட்டியில் யு மும்பா – அரியானா ஸ்டீலர்ஸ் அணிகள் மோதின. ஆட்டத்தின் துவக்கம் முதலே இரு அணி வீரர்களும் மாறி மாறி புள்ளிகள் எடுத்தனர். பரபரப்பாக நடைபெற்ற இந்த போட்டியில் 48-39 என்ற புள்ளிக்கணக்கில் யு மும்பாவை வீழ்த்தி அரியானா ஸ்டீலர்ஸ் வெற்றி பெற்றது.

இந்த தொடரில் இன்றிரவு 8 மணிக்கு நடைபெறும் முதல் போட்டியில் பெங்களூரு புல்ஸ் - ஜெய்ப்பூர் பிங்க் பாந்தர்ஸ் அணிகளும், 9 மணிக்கு நடைபெறும் போட்டியில் தபாங் டெல்லி- புனேரி பால்டன் அணிகள் பலப்பரீட்சை நடத்துகின்றன.