ஏடிபி சாம்பியன் ஷிப்: ஜோகோவிச் - சின்னர் பலப்பரீட்சை!

சர்வதேச ஆடவர் டென்னிஸ் தரவரிசையில் முதல் 8 இடங்களில் உள்ள வீரர்கள் கலந்துகொள்ளும் ஏடிபி இறுதிச்சுற்று எனப்படும் ஆடவர் டென்னிஸ் சாம்பியன்ஷிப் தொடர் இறுதிக்கட்டத்தை எட்டியுள்ளது. இதில் பங்கேற்றிருந்த வீரர்கள் ரெட், கிரீன் என்று இரு பிரிவாக பிரிக்கப்பட்டிருந்தனர்.

ரவுண்ட் ராபின் முறையில் நடைபெற்ற லீக் சுற்றில் ஒவ்வொரு வீரரும் தங்கள் பிரிவில் உள்ள மற்ற வீரர்களுடன் தலா ஒரு முறை மோதினர். லீக் ஆட்டங்களின் முடிவில் 'கிரீன்' பிரிவில் ஜோகோவிச் மற்றும் சின்னர் அரையிறுதிக்கு தகுதி பெற்றனர். 'ரெட்' பிரிவில் கார்லஸ் அல்காரஸ் மற்றும் டேனியல் மேத்வதேவ் அரையிறுதிக்கு தகுதி பெற்றனர்.

அதன்படி நடைபெற்ற முதலாவது அரையிறுதி ஆட்டத்தில் இத்தாலி வீரர் சின்னர், ரஷிய வீரரான மேத்வதேவை வீழ்த்தி இறுதிப் போட்டிக்கு முன்னேறினார். மற்றொரு அரையிறுதி ஆட்டத்தில் நம்பர் 1 வீரரான செர்பியாவை சேர்ந்த நோவக் ஜோகோவிச், ஸ்பெயின் வீரரான அல்காரஸ் உடன் மோதினார்.

இதில் ஜோகோவிச் 6-3 மற்றும் 6-2 என்ற நேர் செட் கணக்கில் அல்காரசை எளிதில் வீழ்த்தி இறுதிப்போட்டிக்கு முன்னேறினார். ஜோகோவிச் இறுதிப்போட்டியில் சின்னருடன் பலப்பரீட்சை நடத்த உள்ளார். முன்னதாக இருவரும் மோதிய லீக் ஆட்டத்தில் ஜோகோவிச்சிற்கு சின்னர் அதிர்ச்சியளித்திருந்தார். இறுதிப் போட்டியில் அவர் அதிர்ச்சியளிப்பாரா அல்லது அங்கிப்போவாரா என்பது தெரிந்து விடும்.