லயோனெல் மெஸ்ஸி- இந்த கால்பந்தாட்ட வீரரின் வருமானம் நிமிடத்துத்துக்கு 20 லட்ச ரூபாய்..!

கிரிக்கெட் ஜுரம் கடந்து கால்பந்து ஜுரம் வரப் போகிறது. ஜூனில் தொடங்கும் 21-வது உலகக் கோப்பை கால்பந்து போட்டிகளுக்காக ரஷ்யா தன்னைத் தயார்படுத்திக் கொண்டிருக்கிறது. கால்பந்தாட்ட வீரர்களும்தான்!

கிரிக்கெட் ரசிகர்களுக்கு சச்சின் எப்படியோ, அப்படித்தான் கால்பந்து ரசிகர்களுக்கு லயோனல் மெஸ்ஸி. கால்பந்து மைதானத்தில் விட்டிலாய் பறந்து எதிரணியின் கோல் எல்லையைத் தாக்கும் அவர், அர்ஜென்டினா கால்பந்து அணிக்காக 61 கோல்கள், பார்சிலோனா கால்பந்து கிளப் அணிக்காக 551 கோல்கள் உட்பட நூற்றுக்கணக்கான கோல்களை அடித்துள்ளார். உலகின் சிறந்த கால்பந்து வீரருக்கான ‘பிஃபா’ விருதை 5 முறை வென்றுள்ள இவரைப் போன்ற வீரர் தங்களுக்குக் கிடைக்க மாட்டாரா என்று ஒவ்வொரு அணியும் தவம் கிடக்கிறது.

உலகின் பணக்கார விளையாட்டு வீரர்களின் பட்டியலில் 3-வது இடத்தில் உள்ள மெஸ்ஸி, ஆண்டுக்கு 1,021.34 கோடி ரூபாய் வருமானம் ஈட்டுவதாகக் கூறப்படுகிறது. இதன்படி பார்த்தால், கால்பந்து மைதானத்தில் நிற்கும் ஒவ்வொரு நிமிடத் துக்கும் தலா 20 லட்ச ரூபாயைச் சம்பாதிக்கிறார் மெஸ்ஸி! ஆனால், இந்த அளவுக்குப் புகழ்பெற்ற மெஸ்ஸியை ஒரு காலத்தில் தங்கள் அணியில் சேர்த்துக்கொள்ளவே பலரும் தயங்கினார்கள் என்றால் நம்ப முடிகிறதா..? ஆனால், அதுதான் உண்மை. அதற்குக் காரணம் அவரைப் பாதித்த நோய்.

அர்ஜென்டினாவில் புரட்சியாளர் சே குவேரா பிறந்த ரோசாரியோ நகரில்தான் லயோனல் மெஸ்ஸியும் பிறந்தார். ஸ்டீல் நிறுவனத்தில் பணியாற்றி வந்த மெஸ்ஸியின் தந்தை ஜார்ஜ் மெஸ்ஸி, அப்போது உள்ளூர் கால்பந்து அணியான கிராண்டோலியின் பயிற்சியாளராக இருந்தார். அவருடன் தினமும் கால்பந்து மைதானத்துக்குச் சென்றுவந்த மெஸ்ஸி, சீக்கிரமே கால்பந்து விளையாட்டைக் கற்றுக் கொண்டார். இதனால் இவர் 5 வயதிலேயே கிராண்டோலியின் சிறுவர் களுக்கான அணியில் இடம் பிடித்தார்.தொடர்ந்து தீவிர பயிற்சியால் கால்பந்து விளையாட்டை வசமாக்கிக்கொண்ட மெஸ்ஸி, 8 வயதில் நியூவெல்ஸ் ஓல்ட் பாய்ஸ் அணியில் இடம் பிடித்தார். அடுத்த சில ஆண்டுகளிலேயே தன் அசாத்தியமான திறமையால் அந்த அணியின் கனவு நாயகனாக உருவெடுத்தார். மெஸ்ஸியின் அசாத்திய திறமையால் அடுத்த 4 ஆண்டுகளுக்கு மற்ற உள்ளூர் கிளப்புகளால் வெல்ல முடியாத அணியாக நியூவெல்ஸ் ஓல்ட் பாய்ஸ் உருவெடுத்தது. மெஸ்ஸியின் புகழும் உள்ளூரில் வேகமாகப் பரவியது.