வேலூர் அருகே காசி விஸ்வநாதர் திருமேனி மீது சூரிய ஒளி விழும் அபூர்வ காட்சி: பக்தர்கள் பரவசம்

வேலூர்: ஜோலார்பேட்டை அருகே மகா சிவராத்திரியையொட்டி காசி விஸ்வநாதர் கோயிலில் நேற்று சிறப்பு அபிஷேக, ஆராதனைகள் நடைபெற்றன. அப்போது, சூரிய ஒளி காசி விஸ்வநாதர் மீது விழுந்ததை கண்ட பக்தர்கள் பரவசமடைந்தனர்.

திருப்பத்தூர் மாவட்டம் ஜோலார்பேட்டை அடுத்த கட்டேரி அம்மையப்பன் நகர் ஊராட்சிக்கு உட்பட்ட வி.எம்.வட்டத்தில் ஸ்ரீ வீர ஆஞ்சநேயர் கோயில் உள்ளது.

இந்த கோயிலில் ஸ்ரீ காசி விஸ்வநாதர் சமேத விசாலாட்சி நந்திகேசவர் பக்தர்களுக்கு அருள்பாலித்து வருகிறார். இங்கு , மகா சிவராத்திரியையொட்டி ஆண்டு தோறும் ஸ்ரீ காசி விஸ்வநாதருக்கு 4 கால யாக பூஜைகள் நடைபெறுகின்றன.

அதன்படி, நேற்று மகா சிவராத்திரியையொட்டி காசி விஸ்வநாதருக்கு நேற்று முன்தினம் தொடங்கி விடிய, விடிய சிறப்பு பூஜைகள் நடைபெற்றன. முதல் கால பூஜை நேற்று மாலை 6.30 மணி முதல் இரவு 9.30 மணி வரையும், இரண்டாம் கால பூஜை இரவு 9.30 மணி முதல் இரவு 12.30 வரையும், மூன்றாம் கால பூஜை அதிகாலை 12‌.30 மணி முதல் 3.30 மணி வரையும், நான்காம் கால பூஜை அதிகாலை 3.30 மணி முதல் 6.30 மணி வரையும் நடைபெற்றது.

மகா சிவராத்திரியையொட்டி மூலவருக்கு சிறப்பு அபிஷேகம், மகா தீபாராதனை நடைபெற்றது. இந்நிலையில், நேற்று காலை 4-ம் கால பூஜை நடந்தபோது காசி விஸ்வநாதர் திருமேனி மீது சூரிய ஒளிக்கதிர் விழுந்தது. ஆண்டுக்கு ஒரு முறை காசி விஸ்வநாதர் மீது சூரிய ஒளிப்படும் அபூர்வ காட்சியானது காலை 7.28 மணி முதல் 7.33 மணி வரை தொடர்ந்து 5 நிமிடங்கள் நீடித்தன.

இந்த 5 நிமிடம் சூரிய ஒளி காசி விஸ்வநாதரின் திருமேனி மீது கீழிருந்து மேல் நோக்கி சிவனை வணங்குவது போல் சூரியஒளி சிவன் மீது பட்டு மறைந்தது. இதனைக் காண ஏராளமான பக்தர்கள் கலந்துகொண்டு ஆச்சரியத்துடனும், வியப்புடனும் கண்டுகளித்தனர். மேலும், சுவாமி மீது சூரிய ஒளிப்படும் அபூர்வ காட்சியை தங்களது கைபேசியில் படம் பிடித்து சமூக வலைதளங்களில் பதிவிட்டு மகிழ்ந்தனர். சூரிய பகவான், காசி விஸ்வநாதரை வணங்கும் அபூர்வ காட்சியை பக்தர்கள் வியப்புடனும் ஆச்சரித்துடனும் கண்டுகளித்து சுவாமியை தரிசனம் செய்து வழிபட்டனர்.

மகா சிவராத்திரியையொட்டி கோயிலில் உள்ள ஸ்ரீ வீர ஆஞ்சநேயர் சுவாமி மற்றும் கோவில் கோமாதாவுக்கு நேற்று சிறப்பு பூஜைகள், ஆராதனைகள் நடைபெற்றன. இதற்கான ஏற்பாடுகளை கோயில் நிர்வாகிகள், பொதுமக்கள் செய்திருந்தனர்.