காமநாயக்கன்பட்டி புனித பரலோக மாதா பேராலயத்தில் விண்ணேற்பு பெருவிழா!

கோவில்பட்டி: கோவில்பட்டி அருகே காமநாயக்கன்பட்டி புனித பரலோக மாதா பேராலயத்தில் நடந்த விண்ணேற்பு பெருவிழாவில் ஆயிரக்கணக்கான மக்கள் கலந்து கொண்டு கும்பிடு சேவை செய்து நேர்ச்சை செலுத்தினர்.

கோவில்பட்டி அருகே காமநாயக்கன்பட்டி தூய பரலோக மாதா பேராலயத்தில் கடந்த 6-ம் தேதி விண்ணேற்பு பெருவிழா கொடியேற்றத்துடன் தொடங்கியது. விழா நாட்களில் தினமும் மறையுரை, திருப்பலி நிகழ்ச்சிகள் நடந்தன. இதில் பல்வேறு பகுதிகளில் இருந்து பங்குத்தந்தைகள் கலந்துகொண்டு மறையுரை வழங்கி திருப்பலி நிறைவேற்றினர். 5-ம் திருநாளான 10-ம் தேதி மரியன்னை மாநாடும், 6-ம் திருநாளான 11-ம் தேதி காலை 8 மணிக்கு புது நன்மை விழா நடந்தது.

9-ம் திருநாளான நேற்று மாலை 7 மணிக்கு ஆடம்பர கூட்டுத் திருப்பலி நடந்தது. 10-ம் திருநாளான இன்று அதிகாலை 2 மணிக்கு தேரடி திருப்பலி தொடங்கியது. பாளையங்கோட்டை மறைமாவட்ட ஆயர் எஸ்.அந்தோனிசாமி தலைமை வகித்து திருப்பலி நிறைவேற்றினார். திருப்பலியில் தென் தமிழகத்தில் இருந்து 50-க்கும் மேற்பட்ட பங்குத்தந்தையர்கள் கலந்து கொண்டனர்.

தொடர்ந்து ஆரோக்கிய மாதா மற்றும் பரலோக மாதா சொரூபங்கள் தாங்கிய தேர் பவனி தொடங்கியது. தேருக்கு பின் ஏராளமான மக்கள் கும்பிடு சேவை செய்து நேர்ச்சை செலுத்தினர். மாலை 5 மணி வரை மக்கள் கும்பிடு சேவை செய்தனர். விழாவில் ஆயிரக்கணக்கானோர் கலந்துகொண்டு பிராத்தனை செய்தனர். தொடர்ந்து காலை முதல் மாலை வரை ஆங்கிலம், மலையாளம், இந்தி ஆகிய மொழிகளில் திருப்பலிகளும், இரவு 7 மணிக்கு சேசு சபை அருட்தந்தையர்கள் சார்பில் திருப்பலி, நற்கருணை பவனி நடைபெற்றன.