சென்னை பல்கலைக்கழக தேர்வு முடிவுகள் வெளியீடு

சென்னை பல்கலைக்கழக இளங்கலை, முதுகலை செமஸ்டர் தேர்வுகளுக்கான முடிவுகள் நேற்று வெளியிடப்பட்டன. மறுமதிப்பீட்டுக்கு மார்ச் 10 முதல் விண்ணப்பிக்கலாம் என அறிவிக்கப்பட்டுள்ளது.

இதுதொடர்பாக சென்னை பல்கலைக்கழக பதிவாளர் வி.ஏழுமலை நேற்று வெளியிட்ட செய்திக்குறிப்பில் கூறியிருப்பதாவது: கடந்த ஆண்டு நவம்பர் மாதம் நடைபெற்ற இளங்கலை, முதுகலை மற்றும் தொழில் படிப்புகளுக்கான தேர்வுகளின் முடிவுகள் வெளியிடப்பட்டுள்ளன. தேர்வு முடிவுகளை www.egovernance.unom.ac.in/results/ www.exam.unom.ac.in/results/ இணையதள முகவரிகளில் மாணவர்கள் அறிந்துகொள்ளலாம்.

கடந்த 2022-2023-ம் கல்வி ஆண்டு மற்றும் அதற்கு பின்பு இளங்கலை படிப்புகளில் சேர்ந்த மாணவர்களும், அதேபோல், 2023-2024-ம் கல்வி ஆண்டு மற்றும் அதன் பிறகு முதுகலை படிப்புகள் மற்றும் தொழில் படிப்புகளில் சேர்ந்த மாணவர்களும் விடைத்தாள் மறுமதிப்பீட்டு விண்ணப்பிக்க தகுதியுடையவர் ஆவர். அவர்கள் விடைத்தாள் மறுமதிப்பீடு கோரி மார்ச் 10 முதல் 14-ம் தேதி வரை விண்ணப்பிக்கலாம். கட்டணம் தாள் ஒன்றுக்கு ரூ.1000. கட்டணத்தை ஆன்லைனில் செலுத்திக்கொள்ளலாம். அதேபோல், இளங்கலை பயிலும் மாணவர்கள் மறுகூட்டலுக்கு மார்ச் 10 முதல் 14-ம் தேதி வரை ஆன்லைனில் விண்ணப்பிக்கலாம். இதற்கு கட்டணம் தாள் ஒன்றுக்கு ரூ.300. இக்கட்டணத்தையும் ஆன்லைனில் செலுத்திவிடலாம். இவ்வாறு அவர் கூறியுள்ளார்.