நாளை விண்ணில் பாய்கிறது பி.எஸ்.எல்.வி சி-60 ராக்கெட்: இன்று கவுண்ட் டவுன் தொடக்கம்

ஆந்திர மாநிலம் ஸ்ரீஹரிகோட்டாவில் இருந்து நாளை டிசம்பர் 30ம் தேதி இரவு 9.58 மணிக்கு பி.எஸ்.எல்.வி சி-60 ராக்கெட் எஸ்.டி.எக்ஸ்.1, எஸ்.டி.எக்ஸ்.2 என தலா 220 கிலோ எடை கொண்ட 2 சிறிய செயற்கைக் கோள்களை சுமந்து செல்ல உள்ள நிலையில், இதற்கான 25 மணி நேர கவுண்ட் டவுன் இன்று இரவு துவனஙகுகிறது.

இந்த ராக்கெட் பூமியில் இருந்து 470 கி.மீ. உயரத்தில் வெவ்வேறு சுற்றுவட்டப் பாதைகளில் 2 செயற்கை கோள்களும் நிலை நிறுத்தப்படும் என தெரிவிக்கப்பட்டுள்ளது. வரும் 2035ம் ஆண்டுக்குள் விண்வெளியில் இந்திய ஆய்வு மையத்தையும் நிறுவ திட்டமிடப்பட்டுள்ள நிலையில், இதற்கான முன் தயாரிப்பு திட்டமாக ஸ்பேஸ்-எக்ஸ் திட்டம் தற்போது செயல்படுத்தப்பட உள்ளது. இந்த திட்டத்தில் ஸ்பேஸ் டாக்கிங் எனப்படும் விண்வெளியில் விண்கலன்களை ஒருங்கிணைக்கும் பணிகள் மேற்கொள்ளப்பட உள்ளது.

இந்நிலையில் ஸ்பேஸ்-எக்ஸ் திட்டத்துக்காக, பி.எஸ்.எல்.வி., சி 60 ராக்கெட் விண்ணில் ஏவப்பட உள்ளது. இது நிலவை ஆய்வு செய்யவும், ஆய்வு மாதிரிகளுடன் பூமிக்கு திரும்ப வரவும், விண்வெளி ஆய்வு நிலையம் அமைக்கவும் தொழில்நுட்ப பரிசோதனை உதவும் என்று கூறப்படுகிறது. இந்த சோதனை வெற்றி பெற்றால், இதை சாதித்த நான்காம் நாடு என்ற பெருமை இந்தியாவுக்கு கிடைக்கும்.