ஐபிஎஸ் அதிகாரியால் என் உயிருக்கு ஆபத்து: அமித்ஷாவுக்கு காங்கிரஸ் எம்எல்ஏ ஜிக்னேஷ் மேவானி கடிதம்!

அகமதாபாத்: ஐபிஎஸ் அதிகாரி ராஜ்குமார் பாண்டியனால் தனது உயிருக்கு அச்சுறுத்தல் இருப்பதாகவும், அந்த அதிகாரியை உடனடியாக சஸ்பெண்ட் செய்யக் கோரியும் குஜராத் காங்கிரஸ் எம்எல்ஏ ஜிக்னேஷ் மேவானி, மத்திய உள்துறை அமைச்சர் அமித் ஷாவுக்கு கடிதம் எழுதியுள்ளார்.

தனது உயிருக்கு அச்சுறுத்தல் விடுத்த ஐபிஎஸ் அதிகாரி ராஜ்குமார் பாண்டியனை உடனடியாக பணி இடைநீக்கம் செய்யக் கோரி காங்கிரஸ் எம்எல்ஏ ஜிக்னேஷ் மேவானி மத்திய அமைச்சர் அமித்ஷாவுக்கு இன்று கடிதம் எழுதியுள்ளார். தனக்கோ அல்லது தனது குடும்பத்தினருக்கோ ஏதேனும் நேர்ந்தால் அதற்கு ஐபிஎஸ் அதிகாரியே பொறுப்பேற்க வேண்டும் என்று அந்தக் கடிதத்தில் மேவானி கூறியுள்ளார்.

ஜிக்னேஷ் மேவானி தனது எக்ஸ் பக்கத்தில், ‘பாபா சித்திக் போன்று நானோ, எனது குடும்பத்தினரோ அல்லது எனது குழுவில் உள்ளவர்கள் யாரேனும் கொல்லப்பட்டால் அதற்கு ஐபிஎஸ் அதிகாரி ராஜ்குமார் பாண்டியன் மட்டுமே பொறுப்பு. குஜராத் மாநிலம் முழுவதும் இந்த அதிகாரியின் குணம் தெரியும். போலி என்கவுண்டர் வழக்கில் ஏழு ஆண்டுகள் சிறை தண்டனை அனுபவித்தவர். என்ன நடந்தாலும், குஜராத் மற்றும் நாட்டிலுள்ள தலித்துகள், பிற்படுத்தப்பட்டோர் மற்றும் பகுஜன்களின் கண்ணியம் மற்றும் சுயமரியாதைக்காக போராடுவதை நான் ஒருபோதும் நிறுத்த மாட்டேன்" என்று பதிவிட்டுள்ளார்.

குஜராத் வட்கம் தொகுதி எம்எல்ஏ மேவானி அமித் ஷாவிற்கு எழுதிய கடிதத்தில், ‘ கட்ச் மாவட்டத்தில் தலித்களின் நிலங்கள் மீதான சட்டவிரோத ஆக்கிரமிப்பு பிரச்சினை பற்றி விவாதிக்க சமீபத்தில் அக்டோபர் 15 அன்று நடந்த கூட்டத்தில் எஸ்சி/எஸ்டி கூடுதல் காவல்துறை இயக்குநர் (ஏடிஜிபி) ராஜ்குமார் பாண்டியன் என்னிடம் தவறாக நடந்து கொண்டார். ராஜ்குமார் பாண்டியனின் முற்றிலும் ஏற்றுக்கொள்ள முடியாத, முறையற்ற மற்றும் இழிவான நடத்தை பற்றிய உண்மைகளை முன்வைக்கிறேன். குஜராத் தலித்துகளுக்கு ஒதுக்கப்பட்ட நிலத்தை சட்டவிரோதமாக ஆக்கிரமித்ததற்கு எதிராக அவர்கள் சார்பாகவும் ஆதரவாகவும் பிரதிநிதித்துவம் செய்யச் சென்றேன்.

அவரது அறைக்குள் நுழைந்த உடனேயே, என்னுடைய மற்றும் குஜராத் காங்கிரஸின் எஸ்சி துறைத் தலைவரான மற்றொரு தலித் தலைவரான ஹிதேந்திர பித்தாடியா ஆகியோரின் மொபைல் போன்களை அறைக்கு வெளியே வைக்கும்படி கேட்டுக் கொண்டார். நாங்கள் உரையாடலை தங்கள் தொலைபேசியில் பதிவு செய்கிறோம் என்று கூறி மொபைல் போன்களை எடுக்கச் சொன்னார். நான் அவரிடம் சொன்னேன், நாங்கள் எங்கள் மொபைல் போன்களை வெளியில் வைத்திருக்க தயாராக இருக்கிறோம். ஆனால் ஒரு எம்.எல்.ஏ.விடம் இப்படி நடந்து கொள்வது பொருத்தமானது இல்லை என்று சொன்னேன்.

இதனால் பாண்டியன் திடீரென கூட்டத்தை முடித்துவிட்டு, "எதிர்காலத்தில் நான் உங்களை உபசரிக்க மாட்டேன்; எனது அலுவலகத்திற்குள் நுழைய அனுமதிக்கப்பட மாட்டீர்கள்" என்று கூறினார். மேலும், பாண்டியன் எனது உடையைப் பற்றி தரக்குறைவான கருத்துக்களை தெரிவித்தார். குறிப்பாக நான் கூட்டத்திற்கு டி-சர்ட் அணிந்திருந்ததை சுட்டிக்காட்டி விமர்சித்தார்.

இத்தகைய முக்கியத்துவம் வாய்ந்த பதவியை வகிக்கும் இவர், தலித்துகளுக்குச் சேவை செய்யத் தவறிவிடுவார் என்று நான் உறுதியாக நம்புகிறேன். எனவே, காவல் துறை அலுவலகங்களின் புனிதத்தையும் நம்பகத்தன்மையையும் தக்கவைக்க நான் பிரார்த்தனை செய்கிறேன். நீங்கள் தயவுசெய்து, உடனடியாக அமலுக்கு வரும் வகையில் ராஜ்குமார் பாண்டியனை பணிநீக்கம் / இடைநீக்கம் செய்ய நடவடிக்கை எடுக்க சம்பந்தப்பட்ட அதிகாரிகளுக்கு தேவையான அறிவுறுத்தல்களை வழங்குங்கள்’ என்று கடிதத்தில் குறிப்பிட்டுள்ளார்