2023-ம் ஆண்டில் இந்தியர்கள் கூகுளில் அதிகம் தேடியது... இவைதான்!

2023-ம் ஆண்டின் இறுதியை எட்டும் சூழலில், கூகுளில் இந்தியர்கள் அதிகம் தேடியது எதுவாக இருக்கும் என்ற கேள்விகளுக்கு சுவாரசிய பதில்கள் கிடைத்துள்ளன. இந்தியாவின் கூகுள் தேடல்களில் ஆதிக்கம் செலுத்தியவை குறித்து இங்கே தெரிந்துகொள்ளலாம்.

சந்திரயான் -3 விண்வெளி திட்டத்தின் வெற்றி உலகமெங்கும் கவனத்தை ஈர்த்ததில், ’சந்திரயான் -3’ என்பதே இந்தியாவில் அதிகம் கூகுள் செய்யப்பட்டதில் 2023ல் முதலிடம் பிடித்துள்ளது. இது உட்பட 2023-ல் கூகுளில் இந்தியா அதிகம் துழாவிய நிகழ்வுகளாக, 1. சந்திரயான்-3, 2. கர்நாடக தேர்தல் முடிவுகள், 3. இஸ்ரேல் செய்திகள், 4. சதீஷ் கௌசிக், 5. பட்ஜெட் 2023, 6. துருக்கி நிலநடுக்கம், 7. அதிக் அகமது 8. மேத்யூ பெர்ரி 9. மணிப்பூர் செய்திகள், 10. ஒடிசா ரயில் விபத்து ஆகியவை டாப் 10-ல் இதே வரிசையில் இடம் பிடித்துள்ளன.

கூகுள் துழாவலில் ‘என்றால் என்ன’ என்ற தேடல் முக்கியமானது. இந்த பட்டியலில் ’ஜி20 என்றால் என்ன?’, ’சாட்ஜிபிடி என்றால் என்ன?’, ’ஹமாஸ் என்றால் என்ன?’, ’செங்கோல் என்றால் என்ன?’ உள்ளிட்ட கேள்விகள் அதிகம் இடம்பிடித்திருந்தன.

அதே போன்று ‘எப்படி’ என்ற கேள்வியின் வரிசையில், சருமம் மற்றும் கூந்தல் பராமரிப்புக்கான வீட்டு வைத்தியம், யூடியூப் சப்ஸ்கிரைபர் எண்ணிக்கையை உயர்த்துவது, கார் மைலேஜை மேம்படுத்துவது, சரியான காஞ்சிபுரம் பட்டுப் புடவையை அடையாளம் காண்பது, ஆதாருடன் பான் இணைப்பு உள்ளிட்டவைகள் ’எப்படி’ என்ற வரிசையில் இடம்பெற்றிருந்தன.

இந்தியாவின் கூகுள் தேடலின் அடிப்படையில் 2023ம் ஆண்டின் பிரபலமான விளையாட்டு நிகழ்வுகளில், ஐபிஎல் மற்றும் உலகக் கோப்பை கிரிக்கெட் ஆகியவை முதல் 2 இடங்களைப் பிடித்திருந்தன. கூகுள் தேடலில் 2023ம் ஆண்டின் பிரபலங்களின் பட்டியலில் பாலிவுட் தாரகை கியாரா அத்வானி முதலிடம் பிடித்திருக்கிறார்.

ஆண்டின் பிரபலமான திரைப்படங்களின் வரிசையில் ஷாருக்கானின் ’ஜவான்’ முதலிடம் பிடித்திருக்கிறது. ரஜினி காந்தின் ’ஜெயிலர்’ 7வது இடத்தையும், விஜயின் ’லியோ’, ’வாரிசு’ ஆகிய திரைப்படங்கள் முறையே 8 மற்றும் 10வது இடத்தையும் பிடித்துள்ளன. இதுவே பிரபல ஓடிடி படைப்புகளின் பட்டியலில் ஷாகித் கபூர், விஜய் சேதுபதி உள்ளிட்டோர் நடித்த ’ஃபார்ஸி’ வலைத்தொடர் முதலிடம் பிடித்துள்ளது.