ஓம், அல்லா இரண்டும் ஒன்றே - மவுலானா மதானியின் கருத்தால் வெடித்துள்ள புதிய சர்ச்சை!

டெல்லியின் ஜமாத் உலாமா-எ-ஹிந்த் மாநாட்டில் அதன் தலைவர் மவுலானா அர்ஷத் மதானி கூறிய கருத்து புதிய சர்ச்சையை கிளப்பி உள்ளது. இதில் அவர், ஓம் - அல்லா இரண்டும் ஒன்றே எனவும், ஆதமும் மனுவும் ஒருவரே என்றும் கூறியதன் மீது இதர மதத்தலைவர்கள் எதிர்ப்பு தெரிவித்துள்ளனர்.

கடந்த 1919 ம் ஆண்டில் தோன்றிய ஜமாத்-எ-உலாமா ஹிந்த் இந்தியாவின் மிகப் பழமையான அமைப்பாகக் கருதப்படுகிறது. இதன் 34 ஆவது மாநாடு, கடந்த பிப்ரவரி 10 ல் டெல்லியின் ராம்லீலா மைதானத்தில் துவங்கி நடைபெற்றது. மவுலானா மதானி தலைமையிலான ஜமாத் உலாமா ஹிந்தின் இம்மாநாட்டின் இறுதி நாளில் இந்து, புத்தம், அனைத்து மதங்களின் தலைவர்கள், குருமார்களும் சிறப்பு விருந்தினர்களாக அழைக்கப்பட்டிருந்தனர். இவர்கள் முன் மேடையில் பேசிய தலைவர் மவுலானா அர்ஷத் மதானியின் கருத்து புதிய சர்ச்சையை கிளப்பி விட்டது.

இந்த மாநாட்டில் மவுலானா மதானி பேசுகையில், ‘உலகிலேயே பழமையான மதம் இஸ்லாம், இந்தியாவில் தோன்றியது. அல்லாவும், ஓம் இரண்டும் ஒன்றே. ராமரோ, பிரம்மரோ இல்லாத காலத்தில் மனு யாரை வணங்கி இருப்பார்? என நான் மதகுருமார்களிடம் கேட்டேன். இதற்கு சிலர் அவர் ஓம் எனும் உருவம் இல்லாததை வணங்கியிருப்பார் எனக் குறிப்பிட்டனர். இந்த ஓம் என்பதைத்தான் நாம் அல்லா என்கிறோம். பாரசீக மொழியில் இதை ஃகுதா என்கிறார்கள். ஆங்கிலத்தில் காட் என்றழைக்கின்றனர். அதேபோல், அல்லாவின் முதல் இறைத்தூதர் ஆதம் ஆவார். இவரை இந்துக்கள் மனு எனவும், கிறித்துவர்கள் ஆடம் என்றும் அழைக்கின்றனர். இம்மூன்று உள்ளிட்ட அனைத்து மதத்தினரின் முன்னோர் ஆதம் ஆவார்.’ என தெரிவித்தார்.

இக்கருத்திற்கு மேடையின் அருகிலிருந்த இதர மதத்தலைவர்கள் ஆமோதிக்க மறுத்தனர். மவுலானா மதானியின் கருத்திற்கு, கடும் எதிர்ப்பு தெரிவிக்கும் வகையில் அம்மாநாட்டிலிருந்து அனைவரும் வெளியேறினர். இவர்களில் ஒருவரான ஜைன மதத்தலைவர் ஆச்சார்யா ஜெயின் முனி லோகேஷ், முன்னதாக மேடை ஏறி தன் எதிர்ப்பை பதிவு செய்தார். இந்த விவகாரத்தில் மவுலானா மதானியுடன் தாம் பொது விவாதம் செய்யவும் தயார் என அறிவித்தார்.

இது குறித்து முனைவர் பட்டம் பெற்றவரான ஜெயின் முனி லோகேஷ் தனது ட்விட்டர் கணக்கிலும் நேற்று முன் தினம் இட்ட பதிவில், ‘மவுலானா மதானி சொல்லும் கருத்தை நானும், எனது மதக்குருமார்களாலும் ஏற்க முடியாது. இதன்மூலம், மதநல்லிணக்கமும், ஒற்றுமையையும் குலைக்க முயற்சிக்கப்படுகிறது. ஓம், அல்லா, மனு அவர்களது பிள்ளைகள் என்பதெல்லாம் வீண் பேச்சுக்கள். இதைபோன்ற ஆயிரம் கதைகளை என்னால் கூற முடியும்.’ எனக் குறிப்பிட்டுள்ளார்.

முஸ்லிம் தலைவர்களும் மவுலானா மதானியின் கருத்திற்கு எதிர்ப்பு தெரிவித்து வருகின்றனர். மனுவும், ஆதமும் வெவ்வேறானவர்கள் தவிர ஒருவர் அல்ல எனவும், அல்லா-ஓம் இரண்டும் கூட ஒன்றல்ல என்றும் கூறி வருகின்றனர். இதே கருத்தை உபியின் சமாஜ்வாதி எம்பியான மவுலானா ஷபிக்கூர் ரஹ்மான் புர்க்கும், வலியுறுத்தி, மதானியை கண்டித்துள்ளார். இச்சூழலில், மவுலானா மதானி கிளப்பிய சர்ச்சையில், உத்தரபிரதேச முதல்வரும் துறவியுமான யோகி ஆதித்யநாத்தும் நேற்று கருத்து கூறியுள்ளார். இதில் அவர், இந்தியர்கள் அனைவரும் இந்துக்களே எனக் கூறி அதற்கு ஒரு புதிய அர்த்தத்தை புகுத்த முயன்றுள்ளார்.

இது குறித்து பாஜக ஆளும் உபியின் முதல்வரான யோகி, ‘இந்தியாவின் ஒவ்வொரு குடிமகனும் இந்து என்பதால், இந்தியா ஒரு இந்து நாடு. ஏனெனில், இந்து என்பது எந்த ஒரு மதத்தையும், சமூகத்தையும் குறிக்கும் சொல் அல்ல. இந்து தேசத்தை எவராலும் தவிர்க்க முடியாது. இந்து என்பதை ஒரு ஜாதி, மதம் அடிப்படையில் புரிந்துகொள்ள முயல்வது தவறு. இந்தியா தொடர்ந்து ஒரு இந்து தேசமாகவே இருக்கும். ஒவ்வொரு இந்தியனும் அதன் அரசியலைமைப்பு சட்டத்தை உயரியதாக மதிக்க வேண்டும்.’ எனக் கூறியுள்ளார்.

சமீபத்தில் ஒரு பொது மேடையில் பேசிய ராஷ்டிரிய ஸ்வயம் சேவக் சங்கின் தலைவர் மோகன் பகவத், இந்து மற்றும் முஸ்லிம்களின் முன்னோர்கள் இருவரும் ஒரே மதத்தை சேர்ந்தவர்கள் எனக் கூறி இருந்தார். இவரது கருத்தை ஆமோதிக்கும் வகையில் தான் ஜமாத் உலாமா-எ-ஹிந்தின் மாநாட்டில் அதன் தலைவர் மவுலானா மதானி கூறிய கருத்து சர்ச்சையை கிளப்பி உள்ளது.

உலமாக்கள் மாநாட்டில் அதன் தலைவர் அர்ஷத் மதானியின் பேச்சால் மதநல்லிணக்கம் குலைவதாகவும் புகார் கிளம்பி உள்ளது. இதனால், மவுலானா அர்ஷத் மதானியின் மீது நடவடிக்கை எடுக்கக் கோரி, டெல்லி மாநகரக் காவல்துறையிடமும் புகார்கள் அளிக்கப்பட்டுள்ளன.

மாநாட்டின் தீர்மானங்கள்

நாடு முழுவதிலும் இருந்து ஆயிரக்கணக்கான மவுலானாக்கள் கலந்து கொண்ட மாநாட்டின் முதல் நாளில் பல தீர்மானங்களும் நிறைவேற்றப்பட்டன. இதன்படி, ’இந்தியாவில் இஸ்லாமியர்களுக்கு எதிரான வெறுப்புணர்வு தொடர்ந்து வளர்ந்து வருகிறது. இதை தடுத்து நிறுத்தாமல் மத்திய அரசும் மவுனம் காக்கிறது. சிறுபான்மையினருக்கு எதிரானக் குற்றங்களில் ஈடுபடுவோரை தண்டிக்க தனியாகச் சட்டம் இயற்ற வேண்டும். இந்தியாவில் இஸ்லாமியர்களுக்கு அவர்களது மத சுதந்திரம் தேவை. இஸ்லாமியர்களுக்கான முஸ்லிம் தனிச்சட்டம் மட்டுமே அமலாக்கப்பட வேண்டும். இஸ்லாமியர்களுக்கு அரசு தனியாக ஒதுக்கீடு அறிவிக்க வேண்டும். சமூக கட்டமைப்பை பலப்படுத்தி இதர மதங்களுடன் சகோதரத்துவம் தொடர வேண்டும்’ எனக் குறிப்பிடப்பட்டுள்ளது.

ஜமாத் உலாமா-எ-ஹிந்த் வரலாறு

ஜமாத் உலாமா-எ-ஹிந்த் என்பது இந்தியாவின் மவுலானாக்களுக்கு உரிய அமைப்பு ஆகும். இவர்கள், உத்தரபிரதேசத்தின் சஹரான்பூர் மாவட்டத்திலுள்ள தியோபந்தின் தாரூல் உலூம் மதரஸாவில் கொள்கைகளை பின்பற்றுபவர்கள். இவர்கள், ஆங்கிலேயர் ஆட்சிக் காலத்தில் படிப்படியாக காங்கிரஸுடன் இணைந்து கிலாபாத் இயக்கத்திலும் தீவிரமாகக் கலந்து கொண்டவர்கள். சுதந்திரத்திற்கு முன்பாக பாகிஸ்தான் பிரிவினையையும், முகம்மது அலி ஜின்னாவையும் எதிர்த்தனர். முஸ்லிம்களுக்கு என தனிநாடு தேவையில்லை எனவும், மதநல்லிணக்கம் கொண்ட ஜனநாயக இந்தியாவே போதுமானது எனவும் வலியுறுத்தினர். எனவே, இதிலிருந்து ஒரு பிரிவினர் ‘ஜமாத் உலாமா-எ-இஸ்லாம் எனும் பெயரில் பிரிந்து இந்தியாவில் செயல்பட்டு வருகின்றனர்.

ஜமாத் உலாமா-எ-ஹிந்தினர், தீவிரவாத வழக்குகள் உள்ளிட்ட முஸ்லிம்கள் மீதான நீதிமன்ற வழக்குகள் உள்ளிட்டவைகளில் உதவி வருகின்றனர். தற்போது ஜமாத் உலாமா-எ-ஹிந்தில் சுமார் ஒரு கோடி உறுப்பினர்களுடன் 1700 கிளைகளும் உள்ளன. மதானி எனும் ஒரே குடும்பத்தின் நிர்வாகத்தில் செயல்படும் இந்த அமைப்பில், 2006 ல் பூசல் கிளம்பியது. இதன் விளைவாக 2008 ல் இரண்டாக பிரிந்து அர்ஷத் மதானி தலைமையிலும், அவரது சகோதரி மகனான மவுலானா மஹ்மூத் மதானி தலைமையிலும் செயல்படுகின்றன.