விபத்தில் சிக்கிய பைக் மீது மோதிய மினிலாரி; பற்றி எரிந்த வாகனங்கள்: பறிபோன உயிர்

மதுரை அருகே சமயநல்லூரில் அடுத்தடுத்து நடந்த விபத்தில் ஒருவர் சம்பவ இடத்திலேயே பலியானார், மற்றொருவர் படுகாயத்துடன் சிகிச்சை பெற்று வருகிறார். மேலும் இரண்டு வாகனங்கள் தீப்பிடித்து எரிந்தது குறித்து காவல்துறையினர் விசாரித்து வருகின்றனர்.

மதுரை மாவட்டம், சோழவந்தான் பகுதியைச் சேர்ந்தவர் 19 வயதான சிபிராஜ். இவர் இன்று அதிகாலை சோழவந்தானில் இருந்து இருசக்கர வாகனத்தில் மதுரையை நோக்கி சென்று கொண்டிருந்தார். அப்போது, சமயநல்லூர் அருகே டபேதார் சந்தை பகுதியில் வாகனம் சென்று கொண்டிருந்த போது கட்டுப்பாட்டை இழந்த சிபிராஜ் சாலையை கடக்க முயன்ற நபர் மீது மோதினார். இதில், சாலையை கடக்க முயன்ற நபர் சம்பவ இடத்திலேயே உயிரிழந்தார். மேலும், சிபிராஜ் படுகாயம் அடைந்தார்.

தொடர்ந்து, சிறிது நேரத்தில் கோவையில் இருந்து மதுரை நோக்கி வந்து சென்று கொண்டிருந்த மினிலாரி ஒன்று விபத்துக்குள்ளான இரு சக்கர வாகனத்தின் மீது மோதியது. இதில் லாரி மற்றும் இருசக்கர வாகனம் தீப்பிடித்து எரிந்தது. தகவல் அறிந்து சம்பவ இடத்திற்கு வந்த சமயநல்லூர் காவல்துறையினர் தீயணைப்பு துறையினர் உதவியுடன் தீயை அணைத்தனர்.

மேலும், இது குறித்து வழக்கு பதிவு செய்த காவல்துறையினர் விசாரித்ததில், இருசக்கர வாகன விபத்தில் உயிரிழந்தவர் சென்னை வடபழனியைச் சேர்ந்த சுந்தர்ராஜன் என்பதும், லாரி ஓட்டுநர் உசிலம்பட்டியைச் சேர்ந்த பாண்டி என்பதும் தெரிய வந்தது. சுந்தர்ராஜன் உடலைக் கைப்பற்றிய காவல்துறையினர் உடற்கூராய்விற்காக அரசு மருத்துவமனைக்கு அனுப்பி வைத்தனர். படுகாயமடைந்த சிபிராஜை சிகிச்சைக்காக மருத்துவமனைக்கு அனுப்பி வைத்தனர்.

மேலும், இந்த விபத்தில் மினிலாரி மற்றும் இருசக்கர வாகனம் முழுமையாக சேதமடைந்தது. அடுத்தடுத்து, நடந்த விபத்து குறித்து காவல்துறையினர் விசாரித்து வருகின்றனர்.