வட்டி வலை வீசிய ஐஎஃப்எஸ் நிறுவனத்திற்குச் சொந்த 21 இடங்களில் அதிரடி ரெய்டு!

இன்டர்நேஷனல் பைனான்சியல் சர்வீஸ் (ஐஎஃப்எஸ்) நிறுவனத்திற்குச் சொந்தமான 21 இடங்களில் பொருளாதார குற்றப்பிரிவு அதிகாரிகள் இன்று அதிரடி சோதனை நடத்தினர்.

வேலூரைத் தலைமையிடமாக கொண்டு இன்டர்நேஷனல் பைனான்சியல் சர்வீஸ்(ஐஎஃப்எஸ்) என்ற நிறுவனம் செயல்பட்டு வருகிறது. இந்நிறுவனத்தை லட்சுமி நாராயணன், வேதநாராயணன் மற்றும் ஜனார்த்தனன் ஆகியோர் இணைந்து நடத்தி வருகின்றனர். ஒரு லட்ச ரூபாய் முதலீடு செய்தால் மாதம் 8,000 ரூபாய் தருவதாக கூறி தமிழகம் முழுவதும் ஆயிரக்கணக்கான மக்களிடம் கோடிக்கணக்கான ரூபாயை இந்நிறுவனம் வசூல் செய்துள்ளது.

மேலும் அவ்வாறு வசூல் செய்யும் நபர்களிடம் ஒரு லட்ச ரூபாய்க்கு இரண்டு சதவீத வட்டிக்கு கடன் வாங்குவதாக ஒப்பந்தம் செய்து கொண்டது. வசூல் செய்த பணத்தை பங்கு வர்த்தகத்தின் முதலீடு செய்து அதிக லாபம் பார்ப்பதாகவும், அந்த லாபத்தில் முதலீட்டாளர்களுக்கு பங்கு தருவதாக கூறி கோடிக்கணக்கான ரூபாய் வசூல் செய்துள்ளனர். பல்வேறு வாட்ஸ் அப் குழுக்கள் அமைத்து இந்நிறுவனம் முதலீடு செய்தவர்களிடம் பணத்தை வசூல் செய்தது. குறிப்பாக ஒரு லட்ச ரூபாய் முதலீடு செய்தவர்களுக்கு மாதம் 8000 ரூபாய் கிடைத்ததை அடுத்து பலரும் அதிகப்படியான தொகையை முதலீடு செய்தனர்.

இந்த நிலையில் இன்டர்நேஷனல் பைனான்சியல் சர்வீஸ் நிறுவனம் மோசடியில் ஈடுபட்டதாக புகார்கள் எழுந்தன. சென்னை காவல் ஆணையர் சங்கர் ஜிவாலுக்கு கிடைத்த ரகசிய தகவல் அடிப்படையில் இது குறித்து விரிவான விசாரணை நடத்தக் கூறி பொருளாதாரக் குற்றப்பிரிவுக்கு பரிந்துரை செய்தார்.

இதனையடுத்து தமிழக முழுவதும் இன்டர்நேஷனல் பைனான்சியல் சர்வீஸ் நிறுவனத்திற்கு தொடர்பான 21 இடங்களில் இன்று காலை முதல் பொருளாதாரக் குற்றப்பிரிவு அதிகாரிகள் அதிரடி சோதனை மேற்கொண்டு வருகின்றனர்.

சென்னை கிண்டியில் உள்ள தாமரை டெக் பார்க் கட்டிடத்தில் செயல்படும் இன்டர்நேஷனல் பைனான்சியல் சர்வீஸ் கார்ப்பரேட் அலுவலகத்திலும் அதிகாரிகள் சோதனை நடத்தி வருகின்றனர். இதேபோல் வேலூர் காட்பாடியிலிருக்கும் தலைமை அலுவலகம் மற்றும் வி.ஜி.ராவ் நகரில் உள்ள உரிமையாளர் லட்சுமி நாராயணன் வீடு, அரக்கோணம், நெமிலி, காஞ்சிபுரம் உள்ளிட்ட அலுவலகங்களிலும் தீவிர சோதனை நடைபெற்று வருகிறது.

முன்னதாக பணத்தை முதலீடு செய்தவர்கள் புகார் அளிப்பதை தடுப்பதற்காக வாட்ஸ்அப் குழு அமைத்து பலருக்கும் இன்டர்நேஷனல் பைனான்ஸ் அண்ட் சர்வீஸ் உரிமையாளர் லட்சுமி நாராயணன் ஆடியோ வெளியிட்டு வந்தது விசாரணையில் தெரியவந்துள்ளது.

இந்த ரெய்டின் முடிவில் தமிழ்நாடு முழுவதும் எவ்வளவு பேரிடம் பணம் வசூல் செய்யப்பட்டது என்றும், பறிமுதல் செய்யப்பட்ட ஆவணங்கள், பணம், தொடர்பான விவரங்கள் அதிகாரப்பூர்வமாக தெரிவிக்கப்படும் என பொருளாதார குற்றப்பிரிவு அதிகாரிகள் தெரிவித்துள்ளனர். இதே போல் சமீபத்தில் 1லட்சம் முதலீடு செய்தால் மாதம் 30 ஆயிரம் வட்டி தருவதாக ஆருத்ரா நிறுவனம் 1400 கோடி ரூபாய் மோசடியில் ஈடுபட்டது குறிப்பிடத்தக்கது.