கனியாமூர் பள்ளி மாணவியின் உடற்கூராய்வு அறிக்கை: உயர் நீதிமன்றம் முக்கிய உத்தரவு

சின்ன சேலம் பள்ளி மாணவியின் உடற்கூராய்வு அறிக்கைகளை புதுச்சேரி ஜிப்மர் மருத்துவமனை நிபுணர்கள் ஆய்வு செய்ய சென்னை உயர் நீதிமன்றம் உத்தரவிட்டுள்ளது.

கள்ளக்குறிச்சி மாவட்டம், சின்ன சேலம் அருகே உள்ள கனியாமூர் தனியார் பள்ளியில் படித்த 12-ம் வகுப்பு மாணவி மரணமடைந்தார். இதையடுத்து, தனது மகளின் உடற்கூராய்வு செய்யும்போது தங்கள் தரப்பு மருத்துவர் இருக்க வேண்டும் என்று தந்தை ராமலிங்கம் கோரிக்கை வைத்தார். இதனை நிராகரித்த நீதிபதி சதீஷ்குமார், 3 அரசு மருத்துவர்கள் மற்றும் ஓய்வுபெற்ற தடயவியல் நிபுணரை நியமித்து மறு உடற்கூராய்வு நடத்த உத்தரவிட்டிருந்தார்.

இதையடுத்து, மாணவியின் தந்தை உச்ச நீதிமன்றத்தில் மேல்முறையீடு செய்தார். அப்போது, தங்கள் தரப்பு மருத்துவர் ஒருவரை நியமிக்க வேண்டும் என்பது தொடர்பாக உயர்நீதிமன்றத்தைதான் நாட வேண்டும் என உச்சநீதிமன்றம் தெரிவித்ததையடுத்து நேற்று காலை வழக்கு திரும்பப் பெறப்பட்டது. இதையடுத்து உயர்நீதிமன்ற நீதிபதி சதீஷ்குமார் முன்பு, மறு உடற்கூராய்வு செய்யப்பட்ட மாணவியின் உடலை பெற்றோர் வாங்க மறுப்பதாகவும், இந்த விவகாரத்தை விசாரிக்க வேண்டுமென நேற்று காவல்துறை தரப்பில் முறையீடு செய்யப்பட்டது.

அதன்படி இந்த வழக்கு இன்று விசாரணைக்கு எடுத்துக்கொள்ளப்பட்டபோது, மாணவியின் தந்தை ராமலிங்கம் வழக்கில் உச்ச நீதிமன்றம் நேற்று பிறப்பித்த உத்தரவு நகலை தமிழக அரசின் தலைமை குற்றவியல் வழக்கறிஞர் அசன் முகமது ஜின்னா தாக்கல் செய்தார். அதை முழுமையாக படித்துப்பார்த்த நீதிபதி, நீதிமன்றம் மீது நம்பிக்கை உள்ளதா? இல்லையா? என மனுதாரர் தரப்பிடம் கேள்வி எழுப்பினார். அப்போது, நீதிமன்றத்தில் ஆஜராகியிருந்த கீழ்ப்பாக்கம் அரசு மருத்துவமனை தடயவியல் துறையை சேர்ந்த செல்வக்குமாரிடம் சில விளக்கங்களை கேட்டார். அதற்கு பதில் அளித்த செல்வக்குமார், அரசு மருத்துவர்களால் இரண்டு முறையும் உடற்கூராய்வு செய்யப்பட்டு, இரு முறையும் வீடியோ பதிவு செய்யப்பட்டுள்ளதாகவும், உயர் நீதிமன்ற உத்தரவுப்படி இரண்டாவது முறை உடற்கூராய்வு செய்தபோது, புதிதாக ஏதும் கண்டுபிடிக்கப்படவில்லை என்றும் விளக்கம் அளித்தார்.

பின்னர் நீதிபதி, மனுதாரர் தரப்பிடம், மகளை இழந்த பெற்றோரின் மீது நீதிமன்றம் அனுதாபம் கொள்வதாகவும், அதேசமயம் நீதிமன்றம் உத்தரவிட்டும் உடலை பெற்றுக்கொள்வதில் தாமதம் ஏன் என கேள்வி எழுப்பினார். ஒவ்வொரு கட்டத்திலும் பிரச்சினை ஏற்படுத்துகிறீர்கள் என்றும், அமைதியான தீர்வு காண வேண்டும் என்றும் அறிவுறுத்திய நீதிபதி, மகளின் உடலை வைத்து பெற்றோர் பந்தயம் கட்டாதீர்கள் என்றும் தெரிவித்தார். மேலும், மாணவி உடல் மறு உடற்கூராய்வு செய்ய வேண்டுமென உயர் நீதிமன்றத்தில் பிறப்பித்த உத்தரவில் உச்ச நீதிமன்றம் தலையிடவில்லை என்பதை சுட்டிக்காட்டிய நீதிபதி, ஏற்கெனவே பிறப்பித்த உத்தரவை திரும்ப பெற போவதில்லை என்று திட்டவட்டமாக தெரிவித்தார்.

வன்முறையில் பாதித்த மாணவர்களை பற்றி எவரும் பேசவில்லை என்றும், இந்த வன்முறையால் கல்வி பாதிக்கப்பட்ட மாணவர்களின் மனநிலை எப்படி இருக்கும் என்பதை யோசித்து பார்க்க வேண்டும் என்றும், அவர்களின் கல்வியை மீட்டெடுக்க வேண்டும் என்றும் நீதிபதி தெரிவித்தபோது, அதுகுறித்து தமிழக முதல்வர் ஆலோசித்துள்ளதாக அரசு தரப்பில் தெரிவிக்கப்பட்டது. மாணவியின் மரணத்தில் வேறு சிலர் ஆதாயம் தேடுவதாக குற்றம்சாட்டிய நீதிபதி, அது மனுதாரர் தரப்பிற்கு தெரியாமலேயே நடந்துள்ளதாகவும் குறிப்பிட்டார். மாணவி மரணம் தொடர்பாக சமூக ஊடகங்கள் முழுவதும் பொய் செய்தியை பரப்பி உள்ளன என்றும் குற்றம்சாட்டினார்.

அதன்பின்னர் உடற்கூராய்வு அறிக்கைகளை புதுச்சேரி ஜிப்மர் மருத்துமனையின் 3 மருத்துவர்கள் மற்றும் தடவியவியல் நிபுணர் ஆகியோர் ஆய்வு செய்து ஒரு மாதத்தில் அறிக்கை தாக்கல் செய்ய உத்தரவிட்டுள்ளார். அறிக்கைகள் மற்றும் வீடியோ பதிவுகளை ஜிப்மர் தரப்பிடம் ஒப்படைக்க தமிழக அரசுக்கும் உத்தரவிட்டார்.

பின்னர் மனுதாரர் தரப்பிடம், மாணவி இறந்து 10 நாட்கள் ஆகிவிட்ட நிலையில், எப்போது உடலைப் பெற்றுக் கொள்கிறீர்கள் என்று கேள்வி எழுப்பியதுடன், உடலை பெற்று கண்ணியமான முறையில் இறுதி சடங்கு நடத்தும்படியும், மகளின் ஆன்மா இளைப்பாறட்டும் என்றும் தெரிவித்தார். மகளின் உடலை நாளை நண்பகல் 11 மணிக்குள் பெற்றுக்கொள்வீர்கள் என நம்புவதாக தெரிவித்த நீதிபதி, அவ்வாறு பெற்றுக்கொள்ளாவிட்டால் காவல்துறை சட்டப்படி இறுதிசடங்குகளை நடத்தலாம் எனவும் அறிவுறுத்தி உள்ளார்.

எப்போது உடலை பெறுவீர்கள் என மனுதாரர் தரப்பை கேட்டு இன்று 12 மணிக்கு தெரிவிக்கும்படி நீதிபதி உத்தரவிட்டார். இதையடுத்து, பெற்றோர் தரப்பில் ஆஜராக வழக்கறிஞர், மாணவியின் உடலை நாளை காலை 6 மணிக்கு பெற்றுக்கொள்கிறோம் என்று தெரிவித்தனர். இதையடுத்து, நீதிபதி, நாளை காலை உடலை பெற்றுக் கொண்டு, மாலைக்குள் இறுதிச் சடங்கை முடிக்க அறிவுறுத்தி வழக்கை முடித்து வைத்தார்.