11-ம் வகுப்பு தேர்வு எழுதிய மாணவர்களுக்கு முக்கிய அறிவிப்பு

11-ம் வகுப்பு தேர்வு முடிவுகள் நாளை மறுநாள் வெளியிடப்பட இருப்பதாக தேர்வுத் துறை அறிவித்துள்ளது.

தமிழகம் மற்றும் புதுச்சேரியில் 2021-22-ம் கல்வியாண்டுக்கான 11-ம் வகுப்பு பொதுத்தேர்வு கடந்த மே மாதம் நடத்தப்பட்டது. இதில் 8 லட்சத்துக்கு மேற்பட்ட மாணவ, மாணவியர் தேர்வை எழுதினர். இந்த பொதுத்தேர்வு முடிவுகள் நாளை மறுநாள் (திங்கட்கிழமை) வெளியிடப்பட இருப்பதாக தேர்வுத் துறை அறிவித்துள்ளது.
இதுதொடர்பாக அரசு தேர்வுகள் இயக்ககம் வெளியிட்டுள்ள அறிக்கையில், "11-ம் வகுப்பு பொதுத்தேர்வு முடிவுகள் 27-ம் தேதி காலை 10 மணிக்கு www.tnresults.nic.in, www.dge.tn.gov.in என்ற இணையதளங்களில் வெளியிடப்பட உள்ளது. தேர்வர்கள் இந்த இணையதளங்களில் தங்களுடைய பதிவெண் மற்றும் பிறந்த தேதி ஆகியவற்றை பதிவு செய்து தேர்வு முடிவுகளை அறிந்து கொள்ளலாம். பள்ளி மாணவ-மாணவிகள் பள்ளிகளில் சமர்ப்பித்த உறுதிமொழி படிவத்தில் குறிப்பிட்டுள்ள செல்போன் எண்ணுக்கும், தனித்தேர்வர்கள் ஆன்லைன் விண்ணப்பப்பதிவில் குறிப்பிட்ட செல்போன் எண்ணுக்கும் குறுஞ்செய்தி வாயிலாக தேர்வு முடிவுகள் அனுப்பப்படும்" என்று கூறப்பட்டுள்ளது.