புதுக்கோட்டை - தவளைப்பள்ளத்தில் 3 மாணவர்களுடன் செயல்படும் அரசுப் பள்ளி!

புதுக்கோட்டை: புதுக்கோட்டை மாவட்டம் திருவரங்குளம் ஒன்றியம் தவளைப்பள்ளம் அரசு தொடக்கப் பள்ளி 3 மாணவர்களுடன் செயல்பட்டு வருகிறது. திருவரங்குளம் ஒன்றியம் குழந்தை விநாயகர் கோட்டை ஊராட்சி தவளைப்பள்ளம் கிராமத்தில் 100-க்கும் மேற்பட்ட குடும்பத்தினர் வசித்து வருகின்றனர்.

இங்குள்ள அரசு தொடக்கப் பள்ளியானது சுமார் 50 ஆண்டுகளாக செயல்பட்டு வருகிறது. 30-க்கும் மேற்பட்ட மாணவ, மாணவிகளுடன் செயல்பட்டு வந்த இப்பள்ளியில், தற்போது 3 பேர் மட்டுமே பயின்று வருகின்றனர்.

இதுகுறித்து தவளைப்பள்ளம் கிராமத்தைச் சேர்ந்த பொதுமக்கள் கூறியதாவது: தவளைப்பள்ளத்துக்கு முக்கிய அடையாளமாக கருதக்கூடிய அரசு தொடக்கப் பள்ளியில் நிறைய பேர் படித்து வந்தனர்.

2 ஆசிரியர்கள் பணிபுரிந்தனர். வகுப்பறைகள் போதுமானதாக உள்ளன. அடிப்படை வசதிகளும் உள்ளன. ஆனால், இப்பள்ளியில் தலைமை ஆசிரியர் மட்டுமே உள்ள நிலையில், அவரும் பணிக்கு உரிய நேரத்துக்கு வருவதில்லை. பள்ளியில் கற்பித்தல் பணியை திறம்பட மேற்கொள்ளாததால் பிற பள்ளிகளில் 6-ம் வகுப்பில் சேர்க்கும்போது அங்கு அடிப்படைக் கல்விகூட தெரியாமல் மாணவர்கள் சிரமப்படுகின்றனர்.

எனவே, இக்கிராமத்தில் தொடக்கப் பள்ளியில் பயிலக்கூடிய வயதில் 18-க்கும் மேற்பட்ட மாணவர்கள் வேறு பள்ளிகளில் பயில்கின்றனர். கடந்த ஆண்டு 11 மாணவர்கள் படித்த நிலையில், தற்போது 2, 4, 5 ஆகிய வகுப்புகளில் தலா ஒருவர் என மொத்தம் 3 பேர் மட்டுமே பயில்கின்றனர். இதுகுறித்து கல்வித் துறை அலுவலர்களுக்கும் தெரிவித்துள்ளோம் என்றனர்.

இதுகுறித்து அறந்தாங்கி மாவட்ட தொடக்கக் கல்வி அலுவலர் என்.கலாராணியிடம் கேட்டபோது, “இதுகுறித்து பள்ளிக்கு சென்று விரைவில் ஆய்வு செய்து நடவடிக்கை எடுக்கப்படும்” என்றார்.