இன்னொரு சாய்ஸ்... இடைநிலை ஆசிரியர் தேர்வுக்கு விண்ணப்பிக்க அவகாசம் நீட்டிப்பு!

தமிழ்நாடு ஆசிரியர் தேர்வு வாரியம் 1,768 இடைநிலை ஆசிரியர் பணியிடங்களை போட்டித் தேர்வுகள் மூலம் நிரப்ப இருக்கிறது. இந்தத் தேர்வுக்கு விண்ணப்பிக்க இன்று (மாரச்.15ம் தேதி) கடைசி நாளாக அறிவிக்கப்பட்டு இருந்தது. தற்போது மார்ச் 20-ம் தேதி வரையில் காலஅவகாசம் நீட்டிக்கப்பட்டுள்ளது.

அரசுப் பள்ளிகளில் காலியாக உள்ள 1,768 இடைநிலை ஆசிரியர் பணியிடங்களை நிரப்புவதற்கான போட்டித் தேர்வு வரும் ஜூன் 23-ம் தேதி நடைபெற உள்ளது. இதில், பங்கேற்க விரும்பமுள்ளோர் ஆசிரியர் பட்டயப்படிப்பு முடித்திருக்க வேண்டும் மற்றும் ஆசிரியர் தகுதித் தேர்வு தாள் 1 தேர்வு எழுதி தேர்ச்சி பெற்றதற்கான சான்றிதழ் பெற்றிருக்க வேண்டும்.

இந்த தேர்வை எழுத 01.07.2024 அன்று 53 வயதுக்கு உட்பட்டவர்கள் விண்ணப்பிக்கலாம். பி.சி, பி.சி.எம், எம்.பி.சி, எஸ்.சி, எஸ்.சி.ஏ மற்றும் எஸ்.டி பிரிவினருக்கு வயது வரம்பில் 5 ஆண்டுகள் தளர்வு அறிவிக்கப்பட்டுள்ளது. இந்த பணிக்கு சம்பளமாக ரூ. 20,600 – 75,900 வரை அளிக்கப்படும்.

இடைநிலை ஆசிரியர் பணித் தேர்வு கொள்குறி வகை (ஒஎம்ஆர்) விடைத்தாள் அடிப்படையில் நடத்தப்பட உள்ளது. வினாத்தாள் இரு பிரிவுகளாக இருக்கும். முதல் பிரிவு கட்டாய தமிழ் தகுதித் தேர்வாகும். இதில் 30 கேள்விகள் இடம்பெறும். இதற்கு 50 மதிப்பெண். தேர்வெழுத 30 நிமிடம் அவகாசம் வழங்கப்படும். அதில் குறைந்தது 20 மதிப்பெண் எடுக்க வேண்டும்.

அடுத்ததாக பொதுப் பிரிவு வினாத்தாளில் 150 வினாக்கள் கேட்கப்படும். தேர்வுக்கு 3 மணி நேரம் அவகாசம் தரப்படும். மொத்தம் உள்ள 150 மதிப்பெண்ணில் தேர்ச்சி பெற பொதுப் பிரிவினர் 60-ம், இதர பிரிவினர் 45-ம் எடுக்க வேண்டும். கட்டாயத் தமிழ் தகுதித் தேர்வில் வெற்றி பெற்றால் மட்டுமே பொதுப் பிரிவு விடைத்தாள் திருத்தப்படும்.

இந்த போட்டித்தேர்வை டெட் முதல் தாள் தேர்ச்சிப் பெற்றவர்கள் மட்டுமே எழுத முடியும். அதன்படி இத்தேர்வை எழுதுவதற்கு தமிழகம் முழுவதும் 47,213 பேர் தகுதி பெற்றவர்களாக உள்ளனர். துறைவாரியான காலிப் பணியிடங்கள், விண்ணப்பிக்கும் வழிமுறை, பாடத்திட்டம் உட்பட கூடுதல் விவரங்களை ஆசிரியர் தேர்வு வாரிய இணையதளத்தில் அறிந்து கொள்ளலாம்.

இந்தப் பணியிடங்களுக்கு https://www.trb.tn.gov.in/ என்ற இணையதளப் பக்கம் மூலம் ஆன்லைனில் விண்ணப்பிக்க வேண்டும். இந்த பணிக்கான இணைய விண்ணப்பப் பதிவு பிப்ரவரி 14-ம் தேதி முதல் நடந்து வருகிறது. இந்நிலையில், விண்ணப்ப பதிவு இன்று மாலையுடன் முடிவடைவதாக அறிவிக்கப்பட்டு இருந்தது. தற்போது வரும் 20ம் தேதி வரையில் கால அவகாசம் நீட்டிக்கப்பட்டுள்ளது. இதுவரை வாய்ப்பை தவறவிட்ட பட்டதாரிகள் உடனடியாக பதிவு செய்து இந்த வாய்ப்பைப் பயன்படுத்திக்கொள்ளும்படி அறிவுறுத்தப்பட்டுள்ளது.