வகுப்பறையில் பேசிக்கொண்டிருந்தபோதே சுருண்டு விழுந்து மாணவி மரணம்; தென்காசி சுரண்டையில் பெரும் அதிர்ச்சி

தென்காசி: சுரண்டை அரசுப் பள்ளி மாணவி வகுப்பறையிலேயே திடீரென மயங்கி விழுந்து மரணமடைந்த சம்பவம் பெரும் அதிர்ச்சியை உருவாக்கியுள்ளது.

தென்காசி மாவட்டம் சுரண்டை அருகே இரட்டைக்குளம் பகுதியைச் சேர்ந்தவர்கள் பிரகாஷ்-மீனா தம்பதியினருக்கு ஒரு மகன், மகள் உள்ளனர். மகள் மானசா சுரண்டையில் உள்ள அரசு மேல்நிலைப் பள்ளியில் ஒன்பதாம் வகுப்பு பயின்று வந்துள்ளார். அவர் இன்று காலை வழக்கம்போல பள்ளிக்கு சென்றிருந்தார். மானசா வகுப்பறையில் சக தோழிகளுடன் சிரித்துப் பேசிக் கொண்டிருந்த பொழுது, திடீரென மயங்கி விழுந்துள்ளார்.

இதனால் அதிர்ச்சியடைந்த சக மாணவிகள் ஆசிரியர்களிடம் தெரிவித்த நிலையில், மானசாவை மருத்துவமனைக்கு கொண்டு சென்றனர். ஆனால் அவரைப் பரிசோதித்த மருத்துவர்கள் அவர் ஏற்கனவே இறந்துவிட்டதாக தெரிவித்தனர். இதுகுறித்து சுரண்டை காவல்துறையினருக்கு தகவல் தெரிவிக்கப்பட்டது

மாணவி உடலை கைப்பற்றிய போலீஸார் தென்காசி அரசு மருத்துவமனைக்கு உடற்கூறாய்விற்காக அனுப்பிவைத்துள்ளனர். இந்த சம்பவம் குறித்து போலீசார் வழக்குப்பதிவு செய்து விசாரணை மேற்கொண்டு வருகின்றனர். பள்ளி மாணவி வகுப்பறையிலேயே திடீரென மரணமடைந்த சம்பவம் பெரும் அதிர்ச்சியை உருவாக்கியுள்ளது.